Washington, Rymphang:
Ka tnat shipai duriaw jong ka United States ha ka Sngi Balang ka la pyntip ba la lap biang ia ka ‘helicopter’ napoh jong ka nongbah California hynrei ka tnat shipai ka dang ialeh ban wad pat sa ia 5 ngut ki dkhot jong katei ka tnat kiba shong hapoh jong katei ka ‘helicopter’ ha ka por ba katei ka liengsuiñ ka leit hap bakla.
La iathuh ba 5 ngut ki shipai ngam um jong ka US kiba shong ha ka liengsuiñ CH-53E Super Stallion helicopter na ka Kad Liengsuiñ shipai na Creech Air Force Base kaba don ha Nevada bad kaba thmu ban leit sha Marine Corps Air Station Miramar kaba don sha ka phang Shathie jong ka nongbah California, ha ka Sngi Ba-ar, katei ka liengsuiñ ka la leit hap bakla noh namar ka jingthut jong katei ka ‘helicopter’ kaba khlem ioh jingmaham eiei na ki kor-ki bor ba la pyndait bad buh hapoh jong katei ka liengsuiñ. Naduh katei ka sngi la ong ba kitei ki 5 ngut ki shipai kiba shong hapoh ki la shu jah rngai khlem ioh jingtip shuh ia ka jaka ba ki leit poi ne hap bad dei tad haduh katei ka Sngi Balang ba ki shipai ngam um ka US ki la lap pat ia katei ka liengsuiñ kaba la hap napoh jong katei hi ka nongbah California.
Ia katei ka ‘helicopter’ la lap pat na ka thaiñ Pine Valley jong ka California ha katei ka sngi ba bud jong katei ka jingleit hap bakla katei ka liengsuiñ.
Kumta, la ong ba ka kynhun ba lai jong ka Marine Aircraft ki dang trei shitom ban bud dien bad ban wad ia kitei ki shipai ba jah baroh bad ki la trei shitom ruh ban ioh pyllait im ia ki ha ka por kaba biang da ka jing-iatrei lang bad ka San Diego County Sheriff bad kumjuh ruh bad kiwei de ki tnat na katei ka nongbah.
Hynrei ka Marine Corps kam shym la iathuh eiei ba kin don ki bynta ba sah ne ka met jong kito kiba shong hapoh jong katei ka liengsuiñ ha katei ka sngi ba la lap ia ka bad kumta la ngeit skhem ruh ba kitei ki shipai kiba shong hapoh baroh 5 ngut kin dang lait im beit na katei ka jingjia.
Namar kumba la iohi ha kine ki por ba la leit, ki don bun tylli ki jingjia leit hap bakla jong ki liengsuiñ kynthup ia ka jinghap bakla jong kawei ka liengsuiñ shipai ha une u snem ba la leit bad kumjuh ruh ka jingleit hap bakla jong ka V-22 Osprey sha ki bynta rud duriaw jong ka Japan ha u Naiwieng ba la leit, ha kaba 8 ngut ki la khlad ha kane ka jingjia.
Kumjuh ruh la ong ba 5 ngut ki dkhot ka tnat shipai jong ka America ki la duh noh ia ka jingim ha ka jing-leit hap bakla jong ka liengsuiñ ‘helicopter’ hapdeng ka jingai jinghikai ia ki ha utei ujuh hi u bnai, katba ka jinghap jong ka liengsuiñ Osprey hapoh Australia pat ka la shim ia ka jingim jong 3 ngut ki shipai ngam um ha u Nailar jong utei hi u snem ba la lah.
