Shillong, Rymphang 08
Ki bor pynïaid ka kynhun ïalehkai ka ri ka la thmu ban pyndep ïa baroh san tylli ki jingïalehkai Test pyrshah ïa ka England khlem Virat Kohli.
Lah ban sngewthuh ba une u nongtied ba kynsai ka ri u lah ban ym wanphai na ka bynta ki jingïalehkai kiba dangsah jong kane Tests namar ki daw shimet.
Kham hashwa na ka liang ki nongjied lem bad ki bor pynïaid ka kynhun ki la kwah ban bishar thuh la u Kohli lah ne em ban ïadon bynta na ka bynta ban ïalehkai ha kane ka jingïalehkai Test. Hynrei hadien la pynthikna ba ka Anushka Sharma lem bad u Virat Kohli ki la khmih lynti ban ïohpdiang ïa i khun iba ar.
Lah ban sngewthuh ba na ka liang Kohli u kwah ban ïadon lang bad la ka ïing ka sem jong u bad dei na kane ka daw ba um shym la kwah ban ïadon bynta ha ki ar tylli ki jingïalehkai Test kiba la long ha Rajkot bad ha Ranchi.
Ki khubor ki ïathuh ba une u khlur nongtied ba kynsai u lah ban wanphai na ka bynta ban ïashim bynta ha ka jingïalehkai Test kaba khatduh ka ban long ha Dharamsala.
“U Kohli u la pan jingbit ba un ym lah ban ïadon bynta hapdeng jong u Rymphang. Lai sngi shwa ka jingïalehkai Test kaba nyngkong, u la pyntip sha ka BCCI ba u donkam ban shim shuti. Ka synjuk ka long kaba burom ïa ka rai ka jong u,” la ong ki tyllong khubor na ka BCCI.
Te kumta na ka liang ka kynhun nongjied ka la hap ban wanrah ka jingkylla ha ka liang ki rangïalehkai na ka bynta ki lai tylli ki jingïalehkai Test kiba dangsah. U Rajat Patidar u lah ban ïoh mih madan ha ka jaka utei u kapten barim jong ka ri.
