New Delhi, Rymphang:
U President jong ka seng Congress u Mallikarjun Kharge hynnin ka sngi u la pyllait ïa ka kot ïong ba la tip kum ka ‘black paper’ kaba pynpaw shai ba ka la don ka jingbym lah pyntreikam jong ka sorkar u Modi ha palat ki 10 snem ba la lah, ha kaba na ka liang u Myntri Rangbahduh khlem da pynslem u la ai pynsted ïa ka jubab ha kaba u la pynpaw ka jingsngewnguh na ka bynta kane ka kot ïong ba la tip ruh kum ka “kaala teeka”.
Kane ka ‘black paper’ ka pynpaw ïa ka jingbymlah pyntreikam jong u Modi uba lamkhmat ïa ka sorkar pdeng halor ka jingbym pynbiang kam pynbiang jam, ka jingkiew dor bad ki jingïakynduh jingeh jong ki nongrep. U Kharge u la ong ba ka la don ka jingap jingma kaba khraw ïa ka synshar paidbah ha ka ri, ha kaba u la bynrap shuh shuh da kaba ong ba ki la don kumba 411 ngut ki MLA ïa kiba la knieh noh da ka BJP ha palat 10 snem.
“Ka la leh donbor ban knieh ïa ka jingsynshar na ki sorkar jong ka seng Congress. Ki la pynduh noh ïa ka synshar paidbah,” la ong u Kharge. U Kharge u la ong ba ka mat kaba kongsan ba la buh ban ïakren ka long ka jingbym don ka jingaikam-jingaijam, ha kaba ka BJP kam ju kren ne ïaphylliew jingmut halor kane.
