Shillong, Rymphang 08
Ban pdiang ïa ka 4th Khelo India University Games 2024, u Myntri Rangbah ka Assam u Himanta Biswa Sarma u la pyllait ïa ka shap (logo) bad u kuboit Ashtalakshmi ha ka dur jong ka thapbalieh ha ka jingïalang kaba la long ha ka sngi Palei ha Guwahati.
Ka Ashta ka pyni ïa ka jingdon ïa bun jait ki jingthaw ba im bad ki jingriew spah ka mei mariang jong ka thaiñ shatei lammihngi. Ka thapbalieh kaba don ïa ki thapniang ka pyni ïa ka jingdon ïa ki jingitynnad ba har rukom bad ki rong ba bun jait kaba pyni ïa ka jingitynnad ka thaiñ shatei lammihngi jong ka ri India.
Kiba la ïadon lang ha kane ka sngi ki long u Nisith Pramanik, u Myntri khynnah na ka bynta ka Youth Affairs and Sports jong ka sorkar pdeng, ka Nandita Garlosa, Myntri ka tnat Sports and Youth Welfare jong ka Sorkar Assam, u Kausar Jamil Hilaly, Secretary ka tnat Sports and Youth Welfare jong ka Assam lem bad ki nongpynïaid jong kane ka lympung ryngkat ki nongïalehkai na ki phra tylli ki jylla ka thaiñ shatei lammihngi.
Ka khlur ïakura ka Pwilao Basumatary, u rangïalehkai badminton u Suraj Goala, u rangïalehkai table tennis u Divyaj Rajkhowa, u rangïalehkai Judo na Tripura u Rikson Debbarma ki la long ki nongshah khot sngewbha.
Haba pynpaw halor ka jingïohi jngi u Myntri Rangbahduh ka ri u Narendra Modi ban pynlut na ka bynta ki samla lyngba ki kam ïalehkai, u Himanta u la ong, “Ka Assam ka don ïa ka thong ha ka ban kyntiew ïa ki kam ïalehkai ha ka thaiñ shatei lammihngi, ha kaba ka la lah ban pynlong ïa ki lympung ïalehkai kiba heh kum ka South East Asian Games, ka 2nd Khelo India Youth Games bad ka Khel Maharan ha kaba ki la don haduh 6 lak ngut ki samla kiba la pynrung kyrteng ban ïashim bynta. Lyngba ka jingpaw ki khlur ïalehkai ha ka Olympic kum ka Lovlina Borgohain kaba na ka Jylla, ka jingpynleit jingmut ka long na ka bynta ki samla khnang ban pynlong ïa ka Assam ba kan don ha ka map jong ka pyrthei.”
“Kum u Myntri Rangbah nga pynpaw na ka liang ka Sorkar ka ai ka jingkyrshan pura na ka bynta ban pynlong ïa kane ka lympung namar ka dei ka jingïohi jingai u Myntri Rangbahduh u Narendra Modi ban pynlut ha ki samla lyngba ki kam ïalehkai. Te kumta ngi khmih lynti ban pdiang sngewbha ïa kumba 5,000 ngut ki nongïashim bynta ha kane ka lympung ïalehkai,” la bynrap u Sarma.
Ha kawei pat ka liang u Nisith Pramanik, uba long u Myntri khynnah na ka bynta ka Youth Affairs and Sports jong ka Sorkar Pdeng, u la ong, “Kumba ngi khmih lynti ban pynlong ïa ka Khelo India University Games 2023, ka dei ka thong jong u Myntri Rangbahduh ban kyntiew ïa ki samla ha ki kam ïalehkai. Hapoh ka jingïalam u Myntri Rangbah ka Assam u Himanta Biswa Sarma, kane ka jylla kan long kaba kiew ha ki kam ïalehkai da kaba pynsan ïa ki nongïalehkai bad kin long ki khlur ïalehkai kiba paw.”
Ha kane ka lympung, ka Assam kan pynlong haduh 16 tylli ki jingïalehkai ha ka Khelo India University Games 2024. Kine ki kynthup ïa ka Athletics, Rugby, Basketball, Volleyball, Swimming, Badminton, Hockey, Fencing, Kabaddi, Football, Tennis, Mallakhamb, Judo, Table Tennis, Boxing bad ka Shooting. Kiwei pat ki jylla ka thaiñ shatei lammihngi kin pynlong ïa ki san tylli ki jingïalehkai kynthup ïa ka Archery, Boxing, Weightlifting, Wrestling bad ka Yogasana. Ïa kane ka lympung yn sdang naduh 19 haduh 29 tarik mynta u bnai.
