Shillong, Rymphang 08
Ka kynhun ïalehkai kriket ka Jylla kan iakhun pyrshah ïa ka Mizoram ha ka semi final jong ka lympung ïalehkai Ranji Trophy (plate group) naduh ka sngi Thohdieng bad ïa kane ka jingïakhun yn pynlong ha
Mangaldai, Assam.
Kane ka kynhun ïalehkai ka Jylla ka la wan ha ka kyrdan ba-ar kata hadien ïa ka Hyderabad, katba ka Mizoram ka la wan ha ka kyrdan balai.
Ha baroh ki jingïalehkai ba la lah, ka Meghalaya ka la lah ban khur jingjop lai sien bad shah rem ar sien kata ha ka Hyderabad bad Mizoram.
Kumba ka paw ka Mizoram ka la long ka kynhun ba la khur ïa ka jingjop da 191 run ha ka jingïalehkai ha la ïing kata ha Anand, Gujarat. Te kumta kine ki kynhun ki la tip bha ban ïalehkai namar ki la ïakynduh teng bad mynta ka kynti ka Meghalaya kan long kum ka kynhun ka ban pynlong ïa kane ka jingïalehkai ha la ïing. Kumba ka long mynta ka madan ïalehkai jong ka MCA kaba ha ka nongbah Shillong ka dangdon hapdeng ka jingpynkhreh na ka bynta ka jingïalehkai sem final jong ka U-23 men’s Col CK Nayudu Trophy, ka ban sdang ha ka sngi U Blei.
Halor kane ka jingïakhun semi final, na ka liang ka Senior Men’s Selection Committee jong ka Megha -laya Cricket Association (MCA) ka la jied ïa ki 15 ngut ki rangïalehkai ki ban mihkhmat ïa ka Jylla ha kane ka jingïakhun jong ka Ranji.
Ïa kane ka kynhun yn lamkhmat kum u kapten da u Kishan Lyngdoh, uba la wan ba hynriew kum u nongtied jong kane ka aiom da kaba kamai 572 run ha ki phra inning, kynthup ïa ka jinglah ban kamai ïa kawei ka shispah run bad lai ki shiteng spah run. U Akash Kumar Choudhury, uba la duh ïalehkai ha ki ar tylli ki jingïalehkai mynta ka aïom na ka daw ka jingmynsaw, u la wanphai biang sha kane ka jingïakhun. Une u nongkawang bol u la lah ban khur 23 wiket ha ki lai sien ïakhun.
Te kumta une u nongkawang bol u la shah kynthup lang hapoh ka kynhun na ka bynta kane ka jingïakhun semi final. Kumjuh u Aryan Borah, uba la lah ban ïalehkai bha ha ka jingïalehkai kaba khatduh pyrshah ïa ka Sikkim na ka bynta ban khur 12 wiket ha ka sien kaba nyngkong eh ha ka Ranji Trophy mynta ka aïom.
Ha kane ka aïom ka MCA ka la rai ban pynïalehkai beit tang da ki rangïalehkai kiba dei napoh kane ka Jylla. Kane ka rai ka long kaba biang eh namar ym tang ban pynlong ïa ka Meghalaya ba kan wan ha ka kyrdan ba-ar, hynrei ki rangïalehkai ki thrang eh ban nangïai bteng ha kane ka jingïaid lynti na ka bynta ban ïoh rung shaduh ka final.
