Shillong, Rymphang 08
Ka kynhun ki ‘thei ïalehkai U-19 ka ri India bad ka Bangladesh ki la ïoh ban rah lang ïa ka nam lahduh ha ka lympung ïalehkai SAFF U19 Women’s Championship 2024 ha ka sngi Palei ha BSSSMK Stadium kaba ha Dhaka.
Kane ka nam jingjop jong kine ki kynhun ka la long kaba kham pher na baroh ki jingïakhun final namar la rai ïa ka nam hadien ba ki la ïakhaid da kaba ïathep mar 11-11 kol ha ka jingïashut tie-breaker.
Kane ka dei ka sien kaba nyng-kong eh ïa kine ki kynhun ba kin ïakhur lang ïa ka nam lahduh ha ka SAFF (South Asian Football Federation).
Ha kane ka jingïakhun final ka India ka la ïoh ban pynkhih jar nyngkong eh lyngba ka Shibani Devi ha ka minit kaba 8. Kane ka shi kol ka la ïai neh haduh kaba kut jong ka kylla step hadien ba ka Bangladesh kam shym la lah ban pynphai.
Hadien ba la bteng ïa ka jingïakhun jong ka kylla miet kine ki kynhun ki la pyrshang ban ïakhun tyngeh bad khamtam ka Bangladesh kaba dangdonkam ban pynphai hynrei kam shym la lah ban pynurlong. Hashwa ban wai ka Bangladesh ka la lah ban pynïakhaid kylla lyngba ka Sagorika ha ka minit kaba 90+3 na ka bynta ban ïakhaid mar shi kol.
Da kane ka jingïakhaid, na ka liang ki bor pynïaid ki la rai ban pynïashut da ka tie-breaker hynrei kaba sngewphylla ka long ba baroh khadwei ngut ki ‘thei ïalehkai na baroh ar liang manla ki la ïoh ban ïathep kol.
Te kumta ban rai ïa ka nam jop, na ka liang ki rephri ki la rai ban shu kynting pisa bad dei hangne ba ka India ka la long ka nongjop. Hynrei na ka liang ki ‘thei ïalehkai ka Bangladesh ki la pynpaw ka jingpyrshah namar ki kwah ban bteng biang ïa ka jingïashut tie-breaker, katba ki nongkyrshan ka Bangladesh ki la kawang da ki maw bad ki bilor um sha madan.
Dei halor kine ki kynrum kynram ba na ka liang ki bor pynïaid ki la hap ban rai jop ia baroh liang (joint winner) bad ka ban pynhun ia ki ba kin long ki lahduh.
