Ka saiñpyrthei ha ka jylla ka la nang kham shongshit hapdeng ka jingdait-thah jong ka tlang namar ka jingïather nia hapdeng ka Voice of the People Party (VPP) bad ka National People’s Party (NPP). Kine ki seng ki la dep ban pynbna ïa ki kyrtong na ka bynta ka ilekshon MP Lok Sabha – Dr Ricky AJ Syngkon na ka VPP bad ka Dr M Ampareen Lyngdoh na ka NPP. Kat nang ïaid ki sngi, ka jingïapyni nia hapdeng kine ki artylli ki seng ka la nang itynnad bad nang khluit. Ngim tip kaei ka ban jia ha ka Dorbar Mang Tyngka jong ka Ïingdorbar Thawaiñ ka ban sdang naduh ka 16 tarik Rymphang lada ngi peit na ki dak ki shin kiba kine ki artylli ki seng ki la kdew naduh kine ki khyndiat sngi ba la lah. Ngi kyrmen ba ka VPP bad ki saw ngut ki MLA jong ka kin wanrah ïa kiba bun ki mat ki jura ban ïatai bad ïakren hapoh Ïingdorbar Thawaiñ bad ba ka sorkar ruh kan da pynshai bad kren shai halor kita ki mat khnang ba ki paidbah kin sngewthuh kham bha ïa ka jinglong jingman jong ka synshar ka khadar ha Meghalaya.
Wat la ka VPP kam dei ka seng kaba ïalam ïa ka liang pyrshah ha Ïingdorbar Thawaiñ, hynrei lah ban ong ba lada ym don sa ka VPP ka ban kynthah ïa ka sorkar jylla ba la ïalam da ka NPP, ngi tharai ka sur jong ki paidbah ka la shu jah ha rngai. Nalor ka VPP, ka don ka Congress bad ka Trinamool Congress ha ka liang pyrshah, hynrei ngi ïohi ba dei tang ka VPP kaba kham shlan ban kren pyrshah ïa ka sorkar halor ki mat ki jura bapher-bapher. Na ka liang ki nongïalam ka NPP ruh bad kumjuh ki katto katne ki Myntri ha ka sorkar, kim banse ban pynphai nia kylla ïa ka VPP. Tangba, lada peit bad pule na ki jingkynthoh ha ki rynsan ‘Social Media’, kham bun na ki nongshong shnong ki ngeit ïa kaei kaba ka VPP ka kren bad ka leh bad ym ïa ka sorkar ne ki nongïalam ka NPP. Hooid, ïa ka jingjop ne jingrem ha ka ilekshon ym lah ban thew tang na ka jingïakynthoh ha ‘Social Media’, hynrei ka pynsngewthuh ïa kiba bun shano ka lyer ka kham beh.
Ka United Democratic Party (UDP)-Hill State People’s Democratic Party (HSPDP) hapoh ka lama jong ka Regional Democratic Alliance (RDA) ki la pynbna ïa u kyrtong na ka bynta ka ilekshon MP Lok Sabha, hynrei haduh mynta, ka dang long kynjah khamtam ba kine ki artylli ki seng saiñpyrthei ki ïatreilang bad ka NPP ha ka sorkar. Kam shonghok than ïa kine ki ar seng ba kin thalaiñ ïa ka sorkar namar ki ruh ki ïadon bynta lang ha ka jingshim ïa ki rai bapher-bapher. Ban shu tei pop tang ïa ka NPP ka long ka kam biej suda. Ngi lah ban ong ba kan kham jwat ïa u kyrtong ka UDP-HSPDP ban leit sha ki paidbah bad ban tyrwa ïalade namar ka jingleh bakla jong kine ki seng naduh ba dep ka ilekshon MLA ha u snem ba la lah. Lada dei ba ki la shong ha ka liang pyrshah, lehse ka jingïakhun kan long da kumwei. Hynrei wat la katta ruh, ïa ka jop ka rem ki kyrtong ha ka ilekshon MP Lok Sabha kan shong ha ka kti jong ki paidbah na ki 36 tylli ki konstitwensi ha ka Rilum Khasi Jaiñtia.
Ka long ruh kaba thamula ïa ka sorkar ban beiñ ban khoh ïa ka VPP ba ki MLA bad ki nongïalam jong ka ki mih sha surok ban kren halor ki mat ki jura ha ka jaka ban ïathir bad ïatai ha Ïingdorbar Thawaiñ. Ha ka synshar paidbah, ym don ka jingkhanglad ïa kano-kano ka seng ne nongshong shnong ban mih sha surok. Nalorkata, ka Dorbar jong ki MLA kam long man la ka sngi ne man ka taïew ne man ka bnai. Ka da don da ka por bad ka aïom. Ngi kynmaw ba wat u Myntri Rangbah ka Delhi, u Arvind Kejriwal, u la leit thiah harud surok wat la u la don ha ka shuki. Ym tang katta, u la pynlong ruh ïa ka jingïalang jong ka Kynhun Myntri ha surok katto katne snem mynshwa. Lada ki MLA ki sngew ba ïa ka sur jong ki ym shym la sngap da ka sorkar tang lyngba ki jingthoh shithi, ki don ïa ka hok ban mih sha surok ryngkat bad ki paidbah. Ka Riti Synshar jong ka Ri India ka shah ïa kane. Lehse kita ki nongkynthoh kin leh kumjuh lada jia ba ka VPP ka don ha ka sorkar. Ka ju long kumta ba haba don ha ka sorkar, hap kren da kumwei, bad ynda la hap shong ha ka liang pyrshah, ym banse ban kren da kumwei. Hap ban ïaid katkum ka jinglong jong ka por bad ha ka shuki kaba kumno hap ban shong.
Nangne shakhmat, ka jingïather nia hapdeng ka Congress, BJP, VPP, NPP, UDP-HSPDP bad kumta ter-ter kan nang kham khluit shuh-shuh. Kan shong ha ki paidbah kumno ki shim ïa kita ki jingkren bad ki jingkynthoh ba markylliang. Ki paidbah ki long kiba kham stad ban ïa ki nongïakhun ilekshon ne ki nongïalam saiñpyrthei. Kaei kaba kiba bun ki paidbah ki pyrkhat, ym don ba tip. Kaei kaba ki paidbah ki kham ïa noh mynsiem, ym don ba bna. Dei tad haduh ynda la pynbna ïa ka jop ka rem jong ki kyrtong ba ka pyrthei kan sa tip shano kiba bun na ki paidbah ki don. Ngin nang ïa peit ha kine ki sngi bad ki por ki ban wan ïa ka jingïakawang nia jong ki mamla bapher-bapher ha ka lympung saiñpyrthei.
