Shillong, Rymphang 08
Ka Shillong Lajong FC ka la wanphai da ka jing-jop ha ka lympung ïaleh-kai U-17 Youth League ba la pynïaid da ka All India Football Federa-tion, hadien ba la lah ban pynliem noh ïa ka kynhun ïalehkai Indian Super League, ka NorthEast United FC da 5-2 kol ha ka sngi Palei.
U Banlamkupar Ryn-jah u la khur ïa ka nam Player of the Match hadien ba u la ïoh ban thep marwei ar kol na ka bynta ban pynlong ïa kane ka kynhun ïalehkai hapoh ka jingïalam u Bah Seibor Sana (coach) ban kamai 8 point ha ka Group-C.
Ha kane ka jingïakhun kaba la long ha SSA Stadium, Polo baroh ar tylli ki kynhun ki la pyrshang ban ïalehkai bha naduh kaba sdang. Ka NorthEast United ka la ïoh ban pynkhih jar nyngkong eh ha ka minit kaba 20 lyngba u Edward Lal-zawmlien. Hadien shiteng kynta une u rangïalehkai shakhmat u la pynbud biang ïa ka kol kaba ar ha ka minit kaba 38 na ka bynta ban tam ar kol ha ka kylla step.
Watla ka Lajong ka la shah thep haduh ar kol, hynrei ka la trei shitom ha ka kylla miet bad ka la ïoh ban pynphai shi kol na ka daw ka jingbakla thep hi u rangïalehkai ka NEUFC u Sarjik Alam ha ka minit kaba 57.
Kane ka shi kol ka la nangpynïoh mynsiem ïa ki rangïalehkai ka Lajong ban ïai bteng ha ka ban ïakhun tyngeh shuh shuh ha kaba u Banlamkupar Rynjah u la ioh ban thep ha ka minit kaba 65.
Ka Lajong ka la thep biang ïa ka kol kaba lai lyngba u Yohaan Ben-jamin ha ka minit kaba 75. Ha ki shiphew minit shwa ban wai ka Lajong ka la ïoh ban thep biang sa ar kol lynga u Meban-kitlang Mawlong (81) bad kawei pat la thep biang da u Banlamkupar Rynjah (88) na ka bynta ban pynlong ïa ka Lajong ban khur syndon ïa ka jingjop.
Ka Shillong Lajong kan pynkhreh ïa ka jingïa-khun ka ban wan pyrshah ïa ka Harisinga Town Club, Udalguri ha ka 12 tarik mynta u bnai ha ka por 2 baje janmiet.
