Guwahati, Rymphang:
Kum ka jingsngewkhia ha kaba ïadei bad ka jingïohi ba kam pat don kano kano ka rai ban shim naduh ba la jia ka jingïakynad bajur ha Manipur ha ki 9 bnai ba la leit, ka kynhun jong ki seng ka jait bynriew Kuki-Zo ki la thmu ban leit ïakynduh ïa u Myntri ka sorkar kmie uba dei khmih ïa ka tnat ki kam pohïing u Amit Shah bad ïa ki heh sorkar jong ka Ministry of Home Affairs (MHA) ha Delhi ha kane ka taïew na ka bynta ban ïakren halor ki jinglong jingman ba mynta kaba dang jia ha ka jylla.
Ka kynhun jong ki nongïalam jong ki riewlum kan sa ïakynduh ïa u Amit Shah bad ïa ki heh ba pawkhmat jong ka MHA, kaba kynthup ïa ki nongïalam jong ka Indigenous Tribal Leaders’ Forum (ITLF), Committee halor ka Tribal Unity, Kuki Inpi Manipur, Zomi Council, Hill Tribal Council bad baroh ki kynhun jong ki riewlum.
U heh nongïalam jong ka ITLF bad u nongaiktien jong ka u Ginza Vualzong u la ong ba ka kynhun nongïalam jong ki riewlum kan sa poi ha Dehi ha ka miet jong ka lah sngi U Blei. Kumba la khmih lynti, la ong ba ki dkhot jong kane ka kynhun kin sa ïakynduh ïa ki heh jong ka MHA ha ka sngi Ba-ar ne ka sngi Balang jong ka taïew ban wan.
Kumba la ïathuh ka tyllong khubor kaba la wan na ka kynhun ITLF la ong ba kin sa ïakren bad ïamir jingmut ha kaba ïadei bad ki jinglong-jingman ba mynta ha Manipur bad halor ki jingeh ba ki briew ki ïakynduh hadien ba la jia ka jingïakynad kaba jur naduh u Jymmang jong u snem 2023.
