Shillong, Rymphang 09
Shi bynta ban pynkhreh na ka bynta ban khur ïa ka nam jop kaba hynriew ha ka Indian Wells, u khlur ïalehkai ba bat ïa ka kyrdan ba nyngkong ha ka pyrthei bad uba la khur haduh 24 ïa ka Grand Slam u Novak Djokovic u la pynkhreh ban wanphai biang sha ka BNP Paribas Open hadien san snem.
Une u rangïalehkai uba la khur ïa ka nam lahduh haduh san sien (2008, 2011, 2014, 2015, 2016) u la khur jingjop haduh 20 sien kynthih naduh u 2014 haduh u 2016. Mynta ka taïew na ka liang ka BNP Paribas Open ka la pyllait ïa ki kyrteng ki nongïalehkai kiba la duh hapoh ka thup.
Kane ka BNP Paribas Open 2024, kan sdang naduh 3 haduh 17 tarik u Lber ha Indian Wells Tennis Garden, ha kaba ki la paw ki khlur ïalehkai kynthup ïa ki lahduh barim jong ka Indian Wells bad ruh kiba dang-thymmai.
U Djokovic u la ïalehkai khatduh ha ka Indian Wells in 2019 hadien ba u la shah rem noh tang ha ka wat kaba lai.
Hadien ba la shah rem ha ka Australian Open, u rangïalehkai ba bat ïa ka kyrdan ba-ar ha ka pyrthei bad uba long ruh u lahduh ha ka BNP Paribas Open u Carlos Alcaraz u la wanphai biang sha ka Tennis Paradise da ka jingthmu ban bteng biang ban kynjoh sha ka thong.
U Alcaraz u la pynkyndih ïa ki paidbah nongpeitkai ha u snem ba la lah, na ka bynta ban long u rangïalehkai ba nyngkong hadien u Roger Federer ha u 2017 ban khur ïa ka jingjop ha ka Indian Wells khlem da shah tam ha ka jingïa-lehkai set.
U Rafael Nadal uba la khur jingjop haduh lai sien ha ka Indian Wells (2007, 2009, 2013), un ïasoh lang bad ki khlur ïalehkai. U Nadal un wanphai sah ka Tennis Paradise hadien ba u la duh ïalehkai ha u snem 2023 na ka daw ka jingmynsaw. Une u rangïalehkai uba la khur haduh 22 sien ïa ka Grand Slam, uba la duh ïalehkai ha ka Australian Open dangshen mynta u snem na ka daw ka jingmynsaw, u la khmih lynti ban wanphai da ka jingkhlaiñ bor ha kane ka aïom.
U Jannik Sinner, uba long u lahduh ha ka Australian Open 2024, u la khmih lynti ban sdang ïa kane ka aïom da ka jingkhlaiñ bor bad u la khmih lynti ban ïai pynneh ïa ka jinglah ban ïalehkai ha katei ka lympung. U Sinner u la don ha ka kyrdan basan ha ka pyrthei bad uba la lah ban ïalehkai bha ha ka sien kaba nyngkong jong kane ka aïom, u la shah rem ha ka semi final ha u rangïalehkai uba la bat ïa ka nam lahduh u Alcaraz.
