Dehradun, Rymphang:
Ki la don arngut ki briew kiba la shah pynïap hadien ba la mih ka jingïakynad ha Haldwani kaba don ha Uttarakhand ha ka Sngi Palei. Ki heh pulit hynnin ka sngi ki la ong ba kine ki jingïakynad ki dei kiba la mut lypa. Hashwa kane ki heh pulit ki la pynjari da ka Curfew hadien ba ki nongshong shnong ki la thang ïa ki kali bad ïa ki thanat jong ki pulit bad kawang ruh da ki maw, halor ka jingpynpra ïa ka Madrasa bad ïa ka jaka mane blei ki Muslim ba la shna beaiñ ha Banbhoolpura.
Kumba la ïathuh ka tyllong khubor, la ong ba kiba bun kiba la shah pynkit sha ki jaka ai jingsumar ki dei ki pulit. Kiwei pat ki dei ki nongtrei Municipal kiba la don bynta ha ka ban pynpra ïa ka Madrasa kaba don ha ka thaiñ bad ïa ka jaka mane blei ki Muslim hajan jong ka.
Kane ka jingïakynad kaba jur ka la shim ïa ka jingim jong arngut ki briew ha ka sngi Palei, katba palat 100 ngut ki pulit ki la mynsaw bad shah sumar ha ki Hospital. Na ka daw jong kane ka jingïakynad baroh ki dukan bad ki skul ki la khang lut. Khnang ban tehlakam ïa kane ka jingïakynad ki bor ba dei khmih ki la pynsangeh treikam shipor ïa ka Internet.
