Shillong, Rymphang 09
Ka lympung ïalehkai 2nd Division Shillong Cricket League ka la nangjam shaphrang ha kaba ka Occult CC bad ka Clusters CC ki la khur ïa ka jingjop.
Ha kane ka jingïakhun kaba la long ha ka sngi Palei ha madan Urkaliar Shillong, ka Occult ka la pynliem noh ïa ka Jersey Kings CC da 8 wiket. Ka Jersey Kings ka la kam trai ban tied nyngkong ha kaba ka la kamai 131 run bad shah pynhap 10 wiket ha ki 18.5 over. U Sunil Gurung u la tied 42 run na ki 42 bol bad u Gopal Sunar u la ïoh 23 run na ki 10 bol. Katba u Rohit Lumbo u la khur 4 wiket bad ïa ki 2 wiket la khur da u Marty Mustafa.
Haba wan shimti ïa ka pali kaba ar, ka Occult ka la kynjoh sha ka thong da kaba kamai 132 run bad shah pynhap 2 wiket ha ki 15.1 over. U Marken B. Kharkongor u la ïoh ban khyrwit ïa ka shiteng spah kaba 63 run na ki 48 bol bad u Pawan Rana u la ïoh 19 run na ki 20 bol. Katba u Sanjeev Rai u la khur shi wiket. Ïa ka nam Player of the Match la khur da u Rohit Lumbo.
Haba phai sha kawei pat ka jingïakhun, ka Clusters ka la jop da 27 run ia ka New Warriors CC. ka Clusters kaba la kam trai ban tied nyngkong, ka la kamai 97 run bad shah pynhap 10 wiket ha ki 18.3 over. U Roshan Sharma u la tied 27 run na ki 26 bol bad u Samir Deb u la ïoh 16 run na ki 21 bol. Katba u Prasanjit Chanda u la khur 3 wiket bad ïa ki 2 wiket la khur da u Sanjiv Ghosh.
Haba wan beh ïa ka thong, ka New Warriors ka la kamai tang 70 run bad shah pynhap 10 wiket ha ki 14.2 over. U Vinay Marbaniang u la tied 29 run na ki 17 bol bad u Lakhan Das u la ïoh 14 run na ki 15 bol. Katba u Vishal Paul bad u Gyandeep Kachari ki la khur mar 3 wiket. Ïa ka nam Player of the Match la khur da u Vishal Paul.
Kane ka lympung kan bteng biang ha ka sngi Saitjaiñ ha kaba ka Metallica CC pyrshah ïa ka Jersey King bad ka Cluster pyrshah ïa ka Golflinks.
