Islamabad, Rymphang:
Ka Pakistan ha ka Sngi Palei ka la khang noh ia baroh ki kor internet bad ki laiñ iakren phone ha kylleng jong ka ri kum shi bynta ban pyniaid beit-pyniaid ryntih ia ka jingthep vote lane ka ilekshon paidbah kaba la pynlong ha katei ka sngi (kata; ka 8 tarik u Rymphang 2024). Da kaba leh kumne kan iarap ban pyniaid beit ia ki kam ki jam baroh kumba la thmu bad kan iarap ruh ban tehlakam ia ki jingeh kiba bun kiba lah ban wan mih ne jia ha kum katei ka sngi.
Kumta, ki bor pyniaid ki la pyntip ba ka Pakistan ha katei ka step ka la pynsangeh treikam noh shipor ia baroh ki laiñ iakren phone bad ki kor internet kiba lah ban ktah ia ka jinglong-jingman bad ka jing shngaiñ ha kum katei ka sngi.
U Lamphang jong ka Pakistan ha katei ka sngi u la iathuh ba ki la don shibun ngut kiba la duh ei noh ia ka jingim na ki jingjia thombor jong ki kynhun lehnoh hapoh Pakistan, bad kumta ruh ki bor pyniaid ha kane ka kynti ki la ialeh katba lah ban tehlakam ia kitei ki jingma kiba ap ia ki paidbah nongshong shnong ba lui-lui jong ka ri da kaba pyntreikam ruh ia ki kyndon kiba kongsan na ka bynta ban pyllait na kum kitei kiei- kiei ki jingjia.
Ki lad pathai khubor jong ka Pakistan ha katei ka sngi ki la iathuh ba kim lah shuh tang ban plie ne pyntreikam ia ka ‘internet’ tang mar ia dei ka por thep vote naduh ka por 8 baje jong katei ka step Sngi Palei bad ka jinglong- jingman jong ka network ka kham sniew bha ha ki thaiñ Southern jong ka nongbah Karachi.
Namar la ong ba ki don kumba 28 ngut kiba la khlad ha 2 tylli ki jingjia bthei bom kiba la jia hapoh Pakistan bad kaba la jia ruh hakhmat ki ophis treikam jong 2 ngut ki nongmihkhmat ka thaiñ Southwest jong ka Pakistan ha ka Sngi Balang. Ia kane ka jingjia la kam bad shim jingkit khlieh hi da ka kynhun lehnoh ka ISIS.
