Islamabad, Rymphang:
Kumba khat ngut ki briew la ong ba ki la duh ei ia ka jingim ha ki 51 tylli ki jingjia thombor da ki kynhun lehnoh ha kylleng ki bynta jong ka Pakistan ha ka Sngi Palei ba la pynlong ia ka ilekshon paidbah. Ha kane ka jingjia 12 ngut ki briew ki la khlad bad 39 ngut pat ki la mynsaw kynthup ia ki pulit kiba ap pahara bad kumjuh ruh ki bor pahara jong ka Pakistan.
Ki lad pathai khubor na Pakistan ki la iathuh ba ka Inter-Services Public Relations (ISPR) ka la pyntip ba ki la don haduh 51 tylli ki jingjia thombor jong ki kynhun lehnoh ha kylleng ki bynta jong ka Pakistan khamtam ha KP bad ha ka nongbah Balochistan. Ka jingthmu jong kane ka long ban pynthut bad pynpulom ia ka jingleit thep vote jong ki paidbah ha katei ka sngi.
Wat la katta, la ong ba ki pulit bad ki bor pahara jong ka Pakistan ki la lah ban ai ka jingpahara kaba skhem bad kaba khlaiñ ha kaba la lah ban pyniaid beit ia katei ka ilekshon paidbah ha katei ka sngi khlem da ktah than eh ia ka jinglong-jingman bad ka jingsuk- jingshngaiñ jong ki riew paidbah ba lui-lui hapdeng ka jingleit ïashim bynta jong ki ban thep vote ha katei ka sngi.
Katkum ka kaiphod ba la ioh lum da ka ISPR, la iathuh ba ki don 12 ngut kiba la khlad noh na kitei ki jingjia kynthup ia 10 ngut kiba dei ki bor pahara bad ki pulit kiba ap pahara ha kitei ki nongbah ba jur ki kam thombor jong ki lehnoh. Kumjuh ruh 39 ngut pat ki dei kiba la mynsaw na kitei ki 51 tylli ki jingjia ha katei ka sngi.
La ong ba watla ki bor pyniaid ka Pakistan ki la phah haduh 1,37,000 ngut ki bor pahara ban leit pahara sha man ki dong ki shnong bad khamtam ha ki jaka ba don ki jaka thep vote, hynrei kitei ki lehnoh ki la ioh ban pyn urlong ia ka kam thombor jong ki, katba katei ka jingthep vote ka la long kaba iaid beit-iaid ryntih ha kiwei ki nongbah kiba ym don jingpynthud eiei namar ka jingkhlaiñ bad jing jur ka jing pahara.
Ha kawei pat ka jingjia, la ong ba 2 ngut ki khynnah rit ki la duh noh ia ka jingim ha ka jingbthei bom hajan ka jaka thep vote kaba don ha Washvood Panjgur ha katei hi ka Sngi Palei.
