Srinagar, Rymphang:
Uwei u briew na Punjab uba la mynsaw jur bha na ka jingshah thombor ha ki lehnoh ha Srinagar ha ka janmiet jong ka sngi Balang u la khlad noh namar ki jingmynsaw jur jong u hynnin ka step, ha kaba da kane, ka jingdon jong ki briew kiba la ïap na ka jingshah thombor ha ki lehnoh ka la kiew sha ar ngut.
Ki heh pulit, ki la ïathuh ba ïa une u briew uba la ïap la tip kyrteng kum u Rohit, une u la mynsaw jur ha ka jingshah thombor ha Shaheed Gunj Srinagar bad u la khlad noh na Sher-i-Kashmir Institute of Medical Sciences (SKIMS) ha ka por 7:55 hynnin ka step. Arngut ki nongbylla kiba na Amritsar ha Punjab, kiba kynthup ïa u Amrit Pal (31) bad u Rohit Mashi (25) ki la shah thombor ha ki lehnoh ki bym shym la lah ban ithuh ha ka janmiet jong ka sngi Balang ha ka por ba ki dang thmu ban leit phai sha ka ïing ba ki sah wai kaba don ha Srinagar.
U Amrit Pal u la long uba nyngkong na ki lanot uba la shah thombor. Ka jingpynïap ïa ki briew ki bym dei na ka thaiñ ne kiba nabar ka la jia ha ka por ba ka sorkar kmie bad ka LG Administration ki la pyntikna ba la dei ban wanrah noh ïa ka shongsuk-shongshngaiñ ha Jammu & Kashmir.
