Guwahati, Rymphang:
Hashwa ban pynlong ïa ka ilekshon, ka Election Department jong ka Assam ka la pyllait paidbah ïa ki Photo Electoral Roll 2024 ha ka 8 tarik, Rymphang, ha ryngkat ka jingmynjurlang katkum ki hukum jong ka Election Commission of India.
Kane ka jingpynbna ka la long ha ka por ba la don ka jingïalang bad ki nongthoh khubor ba la pynlong ha Assam Secretariat, Dispur, ha kaba u Chief Electoral Officer (CEO) Anurag Goel u la pynbna ïa ka jinglum kyrteng jong ki nongthep vote ha ka jylla.
Katkum ka jingïohlum kyrteng thymmai na ka jingdon jong ki nongthep vote, la ong ba kumba 2,43,01,960 ngut ki briew ha Assam, la kynthup ïa 1,21,79,538 ngut ki shynrang bad 1,21,22,602 ngut ki kynthei.
Haba ïanujor bad ka jingïohlum kyrteng ha ka 8 tarik, Nohprah jong u snem 2023, ka jingpyllait ïa ki kyrteng ka la kiew da 508 ngut ki nongthep vote.
U CEO Goel u la pynbna ba kane ka jingpynbiang ha kaba ïadei bad ka jingweng kyrteng noh ïa ki briew kiba la ïap na ki jingpynrung kyrteng ka la paw ba ki la don kumba 7,27,291 tylli ki kyrteng ïa kiba la shah pyndam noh ha kaba la pynrung thymmai da 7,26,783 tylli.
