Ranchi, Rymphang:
Na ka jingbteng ban pynlong ïa ka jingtohkit, ka Enforcement Directorate (ED) ka la lap ba ka la don ka jingïadei kaba ïajan hapdeng u Myntri Rangbah barim jong ka Jharkhand u Hemant Soren bad u MP jong ka seng Congress ha Rajya Sabha u Dheeraj Sahu.
Ha ka 29 tarik, Kyllalyngkot, ka ED ka la ïoh ban kurup ïa ka kali BMW na ka jaka sah jong u Soren kaba don ha Delhi. Mynta ka ED ka la ïoh jingtip ba ïa ka kali la pynrung kyrteng ha ka jaka sah jong u Sahu.
Kum ban shu ïathuh la ong ba ka tnat Income Tax ka la ïoh ban kurup da T. 350 klur ka pisa kaba long ka jingdon jingem na u Sahu ha u Nohprah jong u snem ba la lah. Mynta ka ED ka la ïoh ban kurup ïa ki kali remdor ha kaba ïadei bad ka jingtohkit kaba dang ïai bteng na ka jingdon jong ka jingkamai ïa ka spah bym hok.
Ki heh jong ka ED ki la leit khynra ïa ka jaka sah jong u Soren ha ka nongbah Delhi na ka bynta ban kylli jingkylli bad tohkit ïa u ha kaba ïadei bad ka jingshah kynnoh donkti ha ka kam bamsap naba u nongïalam jong ka Jharkhand Mukti Morcha um shym don ha ka jaka sah jong u hapdeng ka 28 tarik, Kyllalyngkot bad ka 29 tarik, Kyllalyngkot.
Ha ka 20 tarik, Kyllalyngkot, u Soren u la shah tohkit ha ka jaka sah jong u kaba don ha Ranchi halor ka jingshah kynnoh donkti ha ka jingbamsap. Ka ED ka la kem ïa u Soren ha ka 31 tarik, Kyllalyngkot hadien ba la pynlong sa kawei pat ka jingtohkit.
U Soren u la iehnohkam kum u Myntri Rangbah bad u Champai Soren u la shahjied ban long u Myntri Rangbah bathymmai jong ka Jharkhand.
