Shillong, Rymphang 09
U Aryan Borah u la lah ban pynpaw ïa ka jingtbit kum u nongkawang bol na ka bynta ban khur 6 wiket ha ka sngi kaba nyngkong jong ka semi final ha ka lympung ïalehkai Ranji Trophy (plate group) hapdeng ka Meghalaya pyrshah ïa ka Mizoram ha ka sngi Thohdieng ha Mangaldai, Assam.
Haba kam trai ban tied nyngkong, ka Mizoram ka la shah pynkhyllem baroh ki nongtied bad kamai 144 run, katba ka Meghalaya ka la lah ban kynjoh sha 115/5 bad duna sa 29 run.
U Aryan u la lah ban khur 12 wiket ha ki jingïalehkai ba la dep pyrshah ïa ka Sikkim bad mynta ka sngi u la lah ban ïai bteng ban ïalehkai bha, ha kaba u la lah ban pynhap ia ki ar ngut ki nongtied kiba kham hashwa.
Uwei na ki nongtied uba la shah pynhap wiket u dei u rangïalehkai (guest player) u Agni Chopra (53) ha kaba u la shah pynhap ha u Akash Kumar Choudhury, uba la khur 3/36 ha ki 14 over. Uwei pat uba la lah ban pynhap wiket u long u Chengkam Sangma (1/27 ha ki 7 over).
Kumba long ka Mizoram, ka Meghalaya ka la long kawei ka kynhun kaba la pynïalehkai khlem ki rangïalehkai kiba nabar ne ki ‘guest player’ ha ka Ranji Trophy mynta ka aïom bad ki rangïalehkai ka Jylla ki la lah ban pyni shisha ïa ka jingtbit hakhmat kiwei ki kynhun jong ki jylla bapher bapher.
Te kuma ka Meghalaya kan bteng biang ban tied ha ka step jong ka sngi Saitjaiñ.
