Shillong, Rymphang 09
Ka Mylliem SC ka la pynjem khnap ïa ka Umphyrnai SC da 7-0 kol ha ka lympung ïalehkai First Division 2023 ba la pynïaid da ka Shillong Sports Association ha ka sngi Thohdieng ha SSA Stadium, Polo.
Ka Mylliem ka la mad ïa ka jingshah rem ha ki ar tylli ki jingïakhun ba la dep bad mynta ka kynti ka la wanphai da ka jingkhlaiñ bor na ka bynta ban ïoh ïa ka jingjop. Kane ka dei ruh ka jinglah thep kol ba heh duh ha kane ka aiom. Ha kajuh ka por kane ka long ka jingshah rem kaba lai ïa ka Umphyrnai ha kane ka lympung bad ka la jop tang shisien kata ïa ka Mawkhar SC, kaba don ha ka kyrdan ba shatrai.
U Sambor Rapsang u la ïoh ban thep ar kol ha ka minit kaba 22 & 27, katba kiwei pat ki rangïalehkai kiba la ïoh ban thep mar shi kol ki long u Knapjingshai Lawai (14), Janhameshwa Marngar (45), Freestar Kharbangar (46), Raphael G Basaiawmoit (76) bad u Donboklang Majaw (84).
Lyngba kane ka jingjop, ka Mylliem ka la kamai 6 point bad ka la don ha ka kyrdan balai, katba ka Umphyrnai ka la don ha ka kyrdan ba hynriew bad kamai tang 3 point.
Ka jingïalehkai ha ka sngi Saitjaiñ kan long hapdeng ka Lawsohtun SC pyrshah ïa ka Malki SC ha ka por 2:45 janmiet.
