Mumbai, Rymphang:
Ka seng BJP kaba lamkhmat ïa ka sorkar kmie kam shym la lah ban ïakren ei ei ha kaba ïadei bad ki mat kum ha ka jingkiew dor ki mar, ka jingkyrduh kam bad ki jingeh jong ki nongrep, la ong u heh nongïalam jong ka seng Congress ha Maharashtra u Nana Patole ha ka Sngi Balang. U la ïai ban ruh da kaba ong ba ka jingai jingmyntoi na ka bynta ka Ram Temple ka la leit sha ki klur ngut ki briew kiba la nohsynñiang ïa ka, la ïathuh ka tyllong khubor.
Ha ka jingai jingkren ha ka jingïalang bad ki nongthoh khubor, u Patole u la ong ba ki briew ki la shu shah kular kai ha u Myntri Rangbahduh, uba ïalam ïa ka sorkar kmie, ba ki la don ki jingbitar shla jong ki paidbah pyrshah ïa ka seng Bharatiya Janata Party (BJP).
Kane kan sa paw ha ki ilekshon ban wan, u la pynshisha ha ka jingïakren bad ki nongthoh khubor.
U Patole u la kynnoh ba ka sorkar ka la lute ïa ka pisa na ki riewpaidbah ha ka kyrteng jong ka GST (Goods and Services Tax) bad sam ïa ka bad ki heh spah ba ka ïatreikamlang.
“Ka sorkar ba la lamkhmat da ka seng BJP ka la wanrah ïa ka jingkyrduh kam ha ka kyrteng jong ki jingbun ki kam jong ki riewshimet. Ka la ailad da kumba 100 percent ka FDI (foreign direct investment) ha ka tnat ïada ri bad ka la buh ïa ki jingkylli kiba ïadei bad ka jingbym don ka jingshngaiñ ha ka ri,” u la ong ha ka jingïakren bad ki nongthoh khubor.
Ka China ka la wan ban prong tuh sha ki bynta khappud bad kam trai ïa ki jaka jong kane ka ri, hynrei ka sorkar ka shu sngap jar halor kane, u la pynshisha.
Ka jingtreikam jong ka seng BJP ka long ban pyntroiñ ïa ki seng riewlum bad ban pynduh ïa ka dor jong ka synshar paidbah, u la ong ha kaba u la bynrap shuh shuh ba kane ka la paw shai ha ka jingpynlong ïa ka Mayoral ilekshon ha Chandigarh ha kaba ka Supreme Court ka la buh jingkylli halor ka rukom pyntreikam, la ïathuh ka tyllong khubor.
Ka Election Commission of India ka i kumba ka trei katkum ka jingbthah jong ka seng BJP, la ong u Patole.
