Shillong, Rymphang 09
U Kylian Mbappe u lah ban shong shabar na ka jingïalehkai ka Paris Saint-Germain ha ka Ligue 1 pyrshah ïa ka Lille ka ban long ha ka sngi U Blei namar katei ka klob kam kwah ban pynïaleh-kai jubor ïa utei u khlur ïalehkai ka France uba la mynsaw ka kjat khnang ba kan ailad ïa u ban ïalehkai ha ka pre-quarter final jong ka Champions League.
Utei u khlur ïalehkai ka PSG u la mynsaw ka kjat ha ka jingïalehkai pre-quarter final jong ka French Cup ha kaba katei ka kynhun ka la jop da ia ka Brest ha ka sngi Palei bad u Mbappe u la ïoh ban thep kol nyngkong.
Kat kum ki ‘medical test’ ki la pynpaw ba um da jur than ka jingmynsaw, na ka liang u coach ka PSG u Luis Enrique um shym la kwah ban pynïalehkai jubor ïa u hashwa ban pynkhreh ïa ka Cham-pions League pyrshah ïa ka Real Sociedad ha ki san sngi ki ban wan.
La pyndep ruh ïa kiwei ki jingkhmih bniah ïa utei u rangïalehkai uba la thmu ban leit ïasoh sha ka Real Madrid hadien ba ka kontrak ka jong u kan poi sha kaba kut ha kaba kut kane ka aïom ïalehkai.
Kumba ka paw ka lawei jong u Mbappe kam thikna shuh ba un dangïai sah, te kumta na ka liang ka PSG ka la khmih lynti ban bteng ïa ka jingpynïalehkai ha ka jingïalehkai ha la ïing ha Parc des Princes.
Ka jingthmu kane ka klob ban thied ïa ka stadium na ki trei jong ka Paris City Council ka lah ban poi sha kaba kut hadien ka jingïalang kaba la long ha ka sngi Palei.
“Ka la kut mynta, ngi kwah ban mih noh na ka Parc des Princes,” la ong u President ka klub u Nasser Al-Khelaifi.
Kumba ka long mynta ka Lille ka don ha ka kyrdan basaw, ha kaba ka lah ban pynkulmar jingmut ïa ka PSG hashwa ka jingiakhun jong ka Champions League ka ban ha ka sngi Palei.
U rangïalehkai uba la pynmynsaw ia u Mbappe u dei u bak ka Brest u Lilian Brassier, uba la shah beh na madan hadien ba u la ïohpdiang ïa ar tylli ki yellow card.
