Guwahati, Rymphang:
Ha kaba ïadei bad ka jingneh kaba la slem halor ki jingïakajia pud hapdeng ka jylla Assam bad Mizoram, ki Myntri Rangbah jong kine ki jylla ba marjan ki la ïakynduh ha Guwahati ha ka sngi Thohdieng na ka bynta ban ïakren halor kine ki mat. U Myntri Rangabh jong ka Assam u Himanta Biswa Sarma bad u Myntri Rangbah jong ka Mizoram u Lalduhoma ki la ïakular ban trei shitom katba lah ban weng noh ïa ki jingeh kiba mih na ka jingïakajia pud ha kane ka jingïakynduh jong ki.
U Sarma u la kular ïa u Myntri Rangbah jong ka Mizoram u Lalduhoma, ba mar ïakut ka dorbar ha State Assembly jong ka Assam, un sa phah ïa ki Myntri kiba dei khmih na ka bynta ban ïakren halor ka mat ba ïadei bad kane ka bynta sha Aizawl.
Kane ka sienjam ka long ban ïakren lypa ha kaba ïadei bad u pud-u sam, ha kaba ka la wanrah ïa shibun ki jingeh bad ïa kiba la ïakhun da bun bun sien ban wanrah ïa ka jingïasngewthuh jingmut.
Baroh arngut kine ki Myntri Rangbah jong kine ki jylla ki la ïakular ban wanrah ïa ka jingïasuk bad ka jingïakren kaba shai, ha kaba la rai ruh ban sa pynlong ïa ki jingïakren ba bun sien katba ym pat lah ban pynurlong ïa ki jingthmu ha kaba ïadei bad ki jingpynbeit ïa u pud-u sam.
Ka jingïakynduh bad ka jingïalang ba la pynlong ha Guwahati ka long ka dak kaba paw ba ka jingtrei shitom na ka bynta kane ka dang ïai bteng, ha kaba yn sa lah ban weng ïa ki jingeh da ka jingïakren bad ka jingïamir jingmut kaba shai halor kine ki mat ba la buh khnang ba kan ym don shuh kano kano kawei pat ka jingïakajia pud hadien- habud.
