Delhi, Rymphang:
U Dr. Sitaram Jindal, uwei na ki riewkhraw bad riewshemphang uba ïohi jngai ïa shibun kiei kiei, u la shah pynkup khusnam Padma Bhushan namar ki kam jong u kiba u la leh ban wanrah ka jingkylla kiba ïadei bad ki jingpynkoit lyngba ka mariang ne ka Naturecure bad kumjuh ruh ïa ki kam ba bha jong u. La kha ïa u ha ka snem 1932 ha Nalwa, Haryana, ka jingïaid lynti jong u Jindal ha kajba ïadei bad ka Naturecure ka sdang naduh ka por ba u dang pule ha ka skull bah bad ha kata ka por u la mad ïa ka jingshitom kaba jur namar ba u la ïoh jingpang Tuberculosis (TB) ha ki snier.
U la shah sumar ïalade da kaba dih ïa ki dawai kynbat bad u la leit ban shim ïa ka dawai na kawei ka Naturecure Clinic. Kumta da ka jingïohi jngai ban seng noh da kawei ka Naturopathy bad Yoga hospital kaba bit ba biang, u Jindalu la thied ïa kawei ka jaka kaba heh bha kham sha kyndong jong ka Bangalore ha ka snem 1977-79. Kane ka jaka sumar, ka don ruh ïa ka jaka wad bniah ïa kaba la bei tyngka lyngba ka Jindal Aluminium Limited (JAL), bad kane ka jaka ka la long shisha ka jaka kaba don ka jingkyrmen na ka bynta kito kiba kwah ban shah sumar da ki rukom sumar tynrai ha kaba ïadei bad ka koit ka khiah jong ki.
Ka jingtrei ba khlem shongthait jong u Dr. Jindal ka la wanrah shibun ki jingkylla ha kaba ïadei bad ki jingsumar kiba ym donkam dawai, u la thaw ïa ka JNI ha ka rukom kaba bha bad kaba ïaryngkat kyrdan bad kiwei ki jaka sumar ha pyrthei na ka bynta ban sumar ïa ki jingpang bapher bapher, kum ka jingpang sahiaw ne Ashthma, jingpang shini ne Diabetes, jingpang Pressure ne Hypertension, jingpang ktha mat ne Arthritis, bad katto katne ki jait jingpang bampong.
U la long uba jop ha bun na ki kam kiba ïadei bad ka jingshakri mon sngewbha, da kaba pyni ïa ka jingtrei ba radbah jong u ban wanrah ka jingkylla ha ka imlang- sahlang, kynthup ruh ïa ka jingseng ïa ka Hospital Allopathy, skul, bad College, u la lah ruh ban leh shibun ki kam pynroi, kum ka jingshim ïa ki shnong ban buh ïa ki jingshakri ha ka liang ka lad ai jingsumar bad ki jingpule, bad kyrshan ïa bun ki seng treimon sngewbha bapher bapher.
Ka jingtrei ba pura jong u Dr. Jindal ha kaba ïadei bad ka koit-ka khiah, da kaba ban jur ïa ka Naturopathy bad Yoga, ka la wanrah ka jingkylla ha ka jingim jong ki Million ngut ki briew ha kylleng ka pyrthei. Ka jingtrei ba radbah jong u ban wanrah ïa ki jingsumar kiba ïadei bad ki lad jingïada bad ka jingpynsaphriang jingtip halor ka jingktah jong ki dawai ka ïahap bad ka jingngeit jong u ïa ki lad jingsumar lyngba ka Naturopathy bad kaba lah ban ai shisha ban pynduna ïa ka jingban khia ha ki Hospital Allopathy.
