Shillong, Rymphang 11
Ka Malki Sports Club ka la khur ïa ka jingjop kaba ar ha ka lympung First Division 2023 ba la pynïaid da ka Shillong Sports Association hadien ba ka la lah ban pynliem noh ïa ka Lawsohtun Sports Club ha ka jingïalehkai kaba la long ha ka sngi Saitjaiñ ha First Ground, Polo.
Haba phai sha ka jingïalehkai, ka Malki ka la lah ban pynliem noh da 2-0 kol ïa ka Lawsohtun SC. Kine baroh ar tylli ki kol la ïoh ban khyrwit da u Fashioning Syngkli ha ka minit ba 6 bad 30.
Kine baroh ar tylli ki club ki la mad ïa ka bok kaba long kumjuh, ha kaba ka Malki ka la mad ïa ka nam rem ha ki ar tylli ki jingïalehkai sdang hynrei hadien kane, ka la khur pat ar tylli ki jingjop. Katba ka Lawsohtun pat kaba la khur saw point na ki ar tylli ki jingïakhun, mynta ka la mad nam rem pat ha ki ar tylli ki jingïalehkai.
Lyngba kane ka jingjop kaba mynta, ka Malki ka la kiew sha ka kyrdan kaba saw ha ka miej ïakheiñ point da kaba kamai 6 point bad ban ïaryngkat bad ka Mylliem Sports Club hynrei ka Mylliem ka don ha ka kyrdan kaba lai na ka jingïapher ha ka jingthep kol. Katba ka Lawsohtun ka la hiar sha ka kyrdan kaba san napdeng ki hynñiew tylli ki club kiba ïashim bynta ha kane ka lympung.
Ka jingïalehkai ban wan jong kane ka lympung kan long biang ha ka 13 tarik mynta u bnai ha kaba ka Umphyrnai Sports Club kan ïakhun pyrshah ïa ka Laitkor Sports Club ha ka por 2:45 janmiet.
