Nongstoiñ, Rymphang 11
Ka Khliehmawlieh Youth Club ka la ïoh ban rah ïa ka nam lahduh ha ka lympung ïalehkai Super Division ka NDSA Premier League Football Tournament 2023-24, katba ka Nongstoiñ Football Team ka la ïoh khur ïa ka nam lahduh ha ka 1st Division jong kane ka lympung mynta ka samoi ïalehkai.
Haba phai sha ka Khliehmawlieh YC, ka jingïoh rah ka jong ka, ïa ka nam lahduh ha ka Super Division ka NDSA Premier League Football Tournament 2023-24 ka dei hadien ba ka la lah ban pynïakhaid khlem da don mano-mano ba ïoh ban thep kol ha ka jingïakhun kaba khatduh pyrshah ïa ka Pyndengrei SCSC kaba la long ha ka sngi Saitjaiñ jong ka taïew ha madan NDSA ha Nongpyndeng.
Nangta haba phai sha ka jingïoh khur point, ka Khliehmawlieh YC lyngba ka jingïakhaid ha katei ka jingïakhun, ka la ïoh ban khur haduh 23 point ha ka miej ïakheiñ point katba ka Pyndengrei SCSC kala ïoh 20 point.
Haba phai pat sha ka kyrdan 1st Division, ka jingïoh khur jong ka Nongstoiñ FT ïa ka nam lahduh ka dei hadien ba ka la lah ban pynliem noh da 5-4 kol ïa ka Mawiong Pyndengrei lyngba ka jingïashut tie-breaker hadien ka jingïakhaid da mar ar kol ha ka jingïalehkai final kaba la long ha kajuh katei ka sngi ha madan NDSA, ha Nongpyndeng.
Shuh shuh ha katei ka sngi, ha ka First Division ïa ka nam ‘Best Player’ la khur da u Rishandapbon Marwein na ka Nongstoin FT, ka nam ‘Best Goalkeeper’ sha u Pynshaibok Kharit na ka Mawiong Pyndengrei SC katba ïa ka nam ‘Emerging Player’ la ïoh ban khur da u Evershine Kharbani na ka Nongstoin Football Team.
Katba ha ka Super Division ïa ka nam ‘Best Player’ la ïoh khur da u Silbanus Diengngan na ka Upper New Nongstoin, ka nam ‘Best Goalkeeper’ la ïoh da u khlaiñborlang Wahlang na ka Pyndengrei SCSC, ka nam ‘Top Scorer’ la ïoh da u Living Nongrang na ka Khliehmawlieh YC katba ïa ka nam ‘Emerging Player’ la ïoh da u Bankerlang Lyngkhoi na ka Tiehsaw Pengkyllut Sports Club.
Ha katei ka sngi pynhap pyrda ïa ka lympung ïalehkai jong kane ka aiom kaba mynta, la ïadon lang ki nongkitkam ba hakhmat jong ka NDSA ba kynthup ïa u Bah BS Kharlor, President ka NDSA, Bah Mt. Gordon Marngar Secretary ka NDSA, Dr. LL Mawsor, Chairman Football Committee, Bah GJL Sangriang dkhot jong ka Football Committee lem bad kiwei kiwei kiba la sam ruh ïa ki khusnam.
