Ka Synrang Nemcha ka don shaphang shathie lam sepngi ka shong Thangrai – Nongnah, ha ka jaka ba khot ka Wahkaru. Kane ka synrang ka long ka jaka shong jaka sah jong ki briew ki shnong mynshuwa khamtam ha ka por ba don ka ‘nemsniew ne ka kynja jingpang ïa bit ne ka khlam ha ki thaiñ khappud bad ka Pakistan mynnor ka Bangladesh mynta. Ki riew rangbah kiba leit ïew leit hat sha ki ïew khap border ka Pakistan kim lah ban shu wan phai beit shapoh ki shnong ki thaw ki hap ban shong ban sah bad thiah miet ha kane ka krem synrang maw kumba shi taiew ei ei bad ki sa lah ban wan phai shapoh shnong bad ki khun ki kti. Kane ka long ka jingïathuh jong ki riew tymmen kiba la khlad noh. Kane ka jingkiar kiba leit ïew ka long ba kin lait ka wan kit jingpang ïa bit ha ki shnong ki thaw hapoh shnong. Kumta ïa kane ka synrang haduh mynta ki khot ki shynrang Nemcha kaba mut ka synrang kaba pynlong jaka rieh ha ki por ba don ka kynja khlam ha kitao ki thaiñ ha ki por mynshuwa. Ka synrang ka long kaba heh bha lada phin leit rung ban peit ïa ka. Hapoh shynrang ka don ka jaka kaba long shyiap kabit ban shong bad ban sah miet. Hapoh synrang ki pynlong jaka shet jaka tiew bad jaka thiah miet namar ka jaka kaba ïar bad kaba kylluid.
C. B.Iawphniaw
