New Delhi, Rymphang:
U Myntri Rangbahduh u Narendra Modi ha ka sngi Saitjaiñ u la ong ba ki jait bynriew Dalit, ki OBC bad riewlum ki long kiba hakhmat eh ban ïoh ïa ki jingmyntoi kiba wan na ki skhim jong ka sorkar jong u na ka bynta ban kyrshan ïa ki briew ki baduk. Kane ka wan hadien ka jinglah ban pyntreikam ha ki 10 snem ba la leit ban khyllie ïa ki 25 klur na ka jingduk.
Ha ka jingai jingkren jong u ha ka jingplie paidbah ïa ki mawnongrim jong ki 1.3 lak tylli ki ïing hapoh ka jingtreikam jong ka Prime Minister Awas Yojana (PMAY), lyngba ka jingïalang ha ka Video, u Modi u la ong ba na ka bynta u briew uba duk lada u don la kajong ka ïing ka long kaba myntoi eh na ka bynta ka lawei jong u.
“Peit ïa ka dur jong ki 1.3 lak tylli ki ïing. Wat lada nga la don bynta ha ka prokram jong ka ri na ka bynta ban ai ïing hapoh ka jingtreikam jong ka skhim PMAY, ngam pat ju ïohi haduh katne ka jingheh jong ka dur. Nga ai ka jingïaroh ïa ka sorkar Gujarat. Na ka bynta uno uno u briew u baduk, ka jingdon la kajong ka ïing ka long ka jingmyntoi na ka bynta ka lawei kaba bha jong u,” la ong u Modi.
Ki nongïoh myntoi jong ka sorkar jong ngi lyngba ka skhim kaba ai jingkyrshan ïa ki briew ki baduk, ka long na ka bynta ki Dalit, OBC (Other Backward Castes) bad ki riewlum, la ong shuh shuh u Modi, ha ka jingai jubab halor ka jingkynnoh jong ka liang pyrshah ba ka sorkar jong u ka la kyntait bad iehnoh beiñ ïa ki SC, ST bad OBC.
U Modi u la ong ba ki baduk, ki samla, ki nong-rep bad ki longkmie ki la long ki païa na ka bynta ka roi ka par jong ka ri India.
U Myntri Rang-bahduh u la ïai ban shuh shuh da kaba ong ba ka jingïohnong kaba khraw eh jong ka sorkar jong u ha ki 10 snem ba la leit ka long ba u la lah ban khyllie ïa ki 25 klur ngut ki briew na ka jingduk.
