Shillong, Rymphang 11
Ka Real Madrid ka la bteng ban bat ïa ka kyrdan ba nyngkong ha ka miej ïakheiñ point ka lympung La Liga ha Spain hadien ba ka la pynliem ïa ka Girona kaba don ha ka kyrdan ba ar.
Lyngba kane ka jing-jop, ka Real Madrid ka la lah ban tam da 5 point ïa ka Girona. Ha shwa jong ka jingïakhun, ka Real Madrid ka la kamai 58 point na ki 23 tylli ki jingïakhun bad ka Girona ka la kamai 56 point na ki 23 tylli ki jingïalehkai, hynrei hadien ka jingjop, ka Real Madrid mynta ka la kamai 61 point.
Haba phai sha ka jingïalehkai, ka Madrid ka la pynliem da 4-0 kol ïa ka Girona kaba la long ha Bernabeu Stadium. Kane ka jinglah ka Madrid ka la wan ruh lyngba ka jingïalehkai bha jong u Jude Belling-ham uba la ïoh ban khyrwit ar tylli ki shwa ba un mynsaw, kata ha ka minit kaba 35 bad 54 katba ïa kiwei ki ar tylli ki kol pat la ïoh ban thep da u Vinicius Jr ha ka minit kaba 6 bad u Rodrygo ha ka minit kaba 61.
Kumba ka long mynta, u Bellingham u la ïoh ban thep bun kol ha ka La Liga na ka bynta ka Real Madrid ban ïa kiwei pat ki rangïalehkai pdeng ha kawei ka aiom hynrei ka miet na ka bynta une u rangïalehkai ka England ka la kut noh ha ka jingjew namar ka jinghap mih noh shiteng na ma-dan namar ka jingmynsaw ka khohwah.
Lyngba kane ka jingshitom, u Bellingham un duh ban ïalehkai ha ka jingïakhun pyrshah ïa ka RB Leipzig ha ka lympung Champions League.
Ha kiwei pat ki jing-ïalehkai, ka Osasuna ka la lah ban pynliem noh ïa ka Real Sociedad da 1-0 kol, katba ka Las Palmas pat ka la pynliem noh ïa ka Valencia da 2-0 kol katba ka jingïalehkai hapdeng ka Alaves pyrshah ïa ka Villarreal ka la kut noh ha ka jingïakhaid da mar shi kol.
