Shillong, Rymphang 11
Ka hat-trick ba la ïoh da u Akram Afif ka la biang pura ïa ka Qatar ban khur jingjop ha ka final bad rah syndon ïa ka nam lahduh jong ka lympung Asian Cup. Haba phai sha ka jing-ïalehkai final kaba la long ha ka miet sngi Saitjaiñ ha madan Lusail Stadium, ka Qatar ka la lah ban pynliem noh ïa ka Jordan da 3-1 kol. Kane ka jingjop ka la pynlong ruh ïa ka Qatar ka kynhun kaba san ba kan jop kynthih arsien ïa kane ka nam lahduh, kata hadien u snem 2019.
Ka hat-trick kol kaba la ïoh ban khyrwit da u Akram Afif ha kane ka jingïalehkai, kata baroh ki la wan lyngba ka jingshut penalty. Haba phai sha ka jingïalehkai, ka Qatar ka la ïoh ban khyrwit ïa ka kol kaba nyngkong ha ka minit kaba 22 kaba la wan lyngba ka penaly bad haduh ba kut ka kylla step ka la tam da 1-0 kol.
Haba bteng ïa ka kylla miet, ka jingïalehkai ka la long kaba ïakhaid bad itynnad bha bad dei ha ka minit ba 67 ba ka Jordan ka la ïoh ban pynphai ïa ka shi kol lyngba u Yazan Al-Naimat hynrei tang hadien 6 minit kata ha ka minit ba 73, ka Qatar ka la ïoh ïa ka penalty kaba ar bad u Akram Afif khlem pynlehnohei u la khyrwit ïa ka kol ba ar ka jong u bad jong ka kynhun bad ha ki minit wan wai noh artad, ka Qatar ka la ïoh sa ka penalty kaba lai bad ïa kane ruh la wan ban shut biang da u Akram Afif uba la khyrwit syndon ïa la ka hat-trick bad ruh ban ïoh khyrwit haduh phra tylli ki kol ha kane ka lympung.
Ka Qatar kan dei ruh ka kynhun kaba ar ban rah nam lahduh ar sien kynthih, kata hadien jong ka Japan kaba la lah ban leh ïa kane ha u snem 2004.
