Shillong, Rymphang 11
Ka Meghalaya ha ka Sngi U Blei ka la ïoh ban rung sha ka jingïakhun final jong ka Ranji Trophy 2023-24 Plate Group bad nalor kane, ka la ïoh ruh ban buh jaka ïa lade ha ka Elite Group jong ka aiom ka ban wan.
Ka jingïoh rung ka Meg -halaya sha ka final ka la wan hadien ba ka la pynliem ïa ka Mizoram ha ka semifinal ha ka step sngi U Blei ha ka jingïalehkai ba la long ha Mangaldai, Assam da hynriew wiket, kata hadien ba ka la donkam sa tang 28 run ha kane ka sngi ban jop.
Haba beh ïa ka thong kaba 153 ban jingjop, ka Meghalaya ka la pynkut ïa ka sngi Saitjaiñ da kaba kamai 125 run bad hap 4 wiket. U Kishan Lyngdoh kum kapten u la kamai 34 run bad u Jaskirat Singh Sachdeva 19 run.
Kumta ha ka Sngi U Blei, u Kishan bad Jaskirat ki la lah ban pyndep kamai ïa ki run ba sah tang hapoh ka shiteng kynta bad u Kishan u la tied 53 run bad u Jaskirat u la tied 31 run.
Kum ban shu pynkynmaw, ka Mizoram kaba la tied nyngkong ha ka pali ba nyngkong ka la kamai 144 run bad hap lut ki wiket, ka Meghalaya pat ka la tied 145 run ban tam tang da 1 run. Ha ka pali ba ar pat, ka Mizoram ka la lah ban kamai tang 153 run. Kane ka jingbym lah kamai bun run ka Mizoram, ka dei lyngba ka jinglah ban kawang bol bha jong u Aryan Borah bad u Akash Kumar Choudhury kiba la lah ban buh jingeh ïa ki nongtied. U Aryan Borah u la khur 10 wiket bad ai 107 run katba u Akash pat u la khur 8 wiket bad ai 69 run bad lyngba kane ka jinglah ban ïalehkai bha, u Aryan u la khur ïa ka nam ‘Player of the Match’.
Ki dkhot ba la rangbah ka Meghalaya Cricket Association ki la ai khublei bad ïaroh ïa ki rang-ïalehkai bad baroh kiba la ïadon bynta ha kane ka jinglah ka Meg-halaya ban jam sha kawei ka thong.
“Ka jingkhublei sha baroh ki rangïalehkai jong ka kynhun ba mihkhmat sha ka Ranji na ka bynta ka jinglah ban ïoh rung sha ka Elite Group bad ruh ban sa ïakhun ïa ka final jong ka Plate Group. Ka la long shisha ka rai kaba eh ban halor ka jingkynthup ïa ki guest players,” la ong u President ka MCA u Nababrata Bhattacharjee da kaba kdew ïa ka lynti kaba la shim ban nym shaniah eh tang ha ki guest players na ka bynta kane ka lympung. “Ha kaba khatduh, ka long ban ai ka mynsiem ïakhun bad jingshaniah ha ki rangïalehkai ka jylla bad ha kaba ki la lah ban ïoh rung sha ka Elite Group,” la ong u Naba.
“Kane ka jingjop mynta ka sngi pyrshah ïa ka Mizoram ka long shisha kaba kongsan bha ha ka histori jong ka jingïalehkai kriket hapoh ka jylla, ha ka sien kaba nyngkong, ngin ïalehkai ha ka ‘Plate Final’ bad kaba kham kongsan ka dei halor ka jingïoh rung sha ka Elite Group jong ka lympung Ranji Trophy ha ka aiom ban wan,” la ong u Honorary Secretary ka MCA u Bah Gideon Kharkongor.
“Ngi sngew sarong shi katdei eh ba ka kynhun ïalehkai U-16 bad U-19 Men’s Team ki la dep ban ïoh rung sha ka Elite Group jong ka aiom ban wan bad ngi khmih lynti ba ngin lah ban pynlong saw, ha kaba ka kynhun ïalehkai U-23 Col CK Nayudu Trophy ruh ka don ïa ka lad kaba paka ban jop,” u la ong.
Mynta ka Meghalaya kan pyn -khreh ban ïakhun pyrshah ïa ka Hyderabad ha ka final ka ban sdang naduh ka 17 tarik Rym-phang katba ïa ka jaka ym pat rai haduh mynta. Lah ban pynkynmaw ba ha ka ’round robin stage’ ka Hyderabad ka la jop ïa ka Meghalaya ha Shillong da 81 run bad shi pali (innings).
