Guayas, Rymphang:
Ka Myntri jong ka Ecuador ka la shah siat iap noh tang hadien khyndiat por ba ka la kren shaphang ka jingsniew ki surok ha kawei na ki thaiñ jong katei ka ri. Kane ka la jia tang hadien ba katei ka nongialam ka la kren ia kitei ki mat jingeh ha katei ka thaiñ hapoh ka jingialang kaba dang shu dep shen.
Ia katei ka nongialam la ithuh kum ka Diana Carnero, 29 snem ka rta bad ka la shah thombor katba ka dang leit ring dur ia ka jinglong-jingman jong ki surok ha Naranjal jong ka Guayas.
La ong ba katei ka nongialam ka la shah ther kuli na ki bynta jong ka khlieh bad ia kane la leh da 2 ngut ki runar kiba leit poi sha katei ka jaka da ka thuk-thuk ha katei ka sngi. Ki nongsakhi ha katei ka jingjia ki la iathuh ba kitei 2 ngut ki runar ki la leit ban tur shajan jongka bad ki la sei ia ka suloi bad siat ia ka hashwa ba kin phet krad noh bak.
Tang mar kumta hi la ong ba kito kiba ïadon ha katei ka jaka, ki la rah bad pynkit noh ia ka mar-mar sha ka jakasumar kaba don hajan hynrei ki doktor ki la pyntip ba katei ka nongialam kam don shuh naduh ka por ba dang pynrung ia ka hapoh jong ka hospital.
Ki pulit ki la pyntip ba tad haduh ka step Sngi Saitjaiñ ba la pyllait ia kane ka khubor, ym pat shym la ioh kem ïano- ïano ruh kiba don kti ha katei ka jingjia bad ki pulit ki dang ialeh ban buddien bad ban thwet ia kitei ki 2 ngut ki runar kiba la leit ban thombor ia katei ka nongialam ha katei ka jingjia kumba la iathuh da ki nongsakhi bad ki nongbud jongka.
Kumta la ong ba katei ka jingshah siat iap jong katei ka nongialam ha kane ka kynti, ka la pynkhih win ia katei ka ri baroh kawei namar ka rta jongka ruh ka long kaba dang khlaiñ bad samla bha hynrei ka la shah shim jobor ia ka mynsiem ba kordor da ka jingleh dusmon jong kitei ki runar kiba buh shun ia ka.
Na ka liang ki bor pyniaid jong katei ka ri, ki la pynrem jur halor katei ka jingjia bad khamtam ia ki jingshah thombor bad jingshah ktah kti jong ki nongialam saiñ pyrthei bad kumta ruh la ong ba ki bor pyniaid kin phah thwet haduh ban da lap ia kitei kiba don kti baroh bad yn pynshitom ia ki katkum ka pynkheiñ aiñ jong ki hi.
