Itanagar, Rymphang:
Ka kynhun Special Investigation Cell (Vigilance) jong ki pulit ka Arunachal Pradesh ki la ïoh ban kem ïa saw ngut ki heh sorkar ha kaba ïadei bad ka jingdonkti ban thung kam beaiñ ïa ki nonghikai Primary bad kiwei pat ki nongtrei hapoh ka tnat pule-puthi ha Changlang distrik.
Ïa ka mukotduma la pynngat hapoh ki kyndon 120(B)/420/409/468/471 IPC R/W Sec. 13(2) PC Act, 1988, halor ka jingthung kam beaiñ ïa ki nonghikai bad kiwei pat ki nongtrei ha ka tnat pule-puthi ha Changlang, hadien ba la khmih bniah ïa ki jingmudui ba la phah da ki kynhun seng jong ki khynnah pule bad da ki seng bapher bapher.
Ïa ka jingmudui halor kane ka jingjia la buh bad ka SIC (Vigilance) ha ka 17 tarik, Nailar, 2023. U Anant Mittal, uba long u Superintendent of Police ha SIC (Vigilance), Arunachal Pradesh, u la ong ba ïa kine ki briew la kem hadien ba la khmih bniah ïa ki rukom pyntreikam baroh bad hadien ka jingtohkit kaba bniah.
Kine kiba la shahkem ki dei kiba la tip kyrteng kum u Lamaung Mossang (44), u Upper Division Clerk-cum-Accountant; u Chaipot Techai (52), u Tained Graduate Teacher (BEO); Lomkam Rekhung (47), u Lower Division Clerk; bad u Likkem Tangha (58), u UDC-cum-Cashier.
