New Delhi, Rymphang:
Kum ka jingkyntu kynpham ba la phah sha ki seng saiñ pyrthei, ka kynhun ba dei khmih halor ki kam ba ïadei bad ka ilekshon, ka la ong ba ka la ïakhun tyngeh ban khanglad ha kaba ïadei bad ka jingpyndonkam ïa ki khynnah ha kano kano ka bynta ha ki kam ilekshon da ki seng saiñ pyrthei bad kumjuh kyrtong.
Hashwa ban don ka ilekshon Lok Sabha, ka Election Commission ka la bthah ïa ki seng saiñ pyrthei ba kim dei ban pyndonkam da ki khynnah ha ka ban leit ïalap ilekshon la ka long ha kano kano ka rukom”, kynthup ha ka ban sam ïa ki Poster ki kot shi sla ne kino kino ki jingthoh.
Ki nongïalam jong ki seng saiñ pyrthei ne ki kyrtong kim dei ban pyndonkam da ki khynnah rit na ka bynta ki kam ba ïadei bad ka jingïalap ilekshon ha kaba ïadei bad ki kam kiba kynthup ban bat ïa ki khun jong ki ha ki ksang kti, ban rah ïa ki khun ha ki kali ne don bynta ha ki jingïaïaid paidbah, la ong ka kynhun ba dei khmih halor kane.
“Kane ka jingpyrkhing ka la khang pyrshah ban pyndonkam ïa ki khynnah rit ha ka ban pynpule ïa ki poitri, ban rwai, ban kren ïa ki kyntien ne ban leh ïa ki kam ba ïadei bad ka seng ne bad ki kyrtong…,” la ong ka jingthoh ba la wan na ka EC.
Ha kaba ïadei bad kane, la ong ba ka jingdonlang jong ki khun bad ki kmie ki kpa jong ki, ne ki bahaïaing kiba ri ba sumar ïa ki hajan ki nongïalam jong ki seng saiñ pyrthei ki bym don bynta ban leh ïa ki kam ba ïadei bad ka ilekshon ne ka jingïalap ilekshon, kin ym shah pynngat ha ki kyndon ba la buh ne ïa kiba la pyntreikam, la ong ka jingthoh.
