Shillong, Rymphang 12
Ka kynhun ïalehkai U-23 ka Jylla ka la lah ban pynthikna ban jam sha ka final ha ka lympung ïalehkai Col CK Nayudu Trophy (plate group) hadien ba ka la lah ban pynliem noh ïa ka Mizoram da shi inning bad 107 run ha ka jingïakhun semi final kaba la long ha ka lah sngi U Blei ha kane ka nongbah.
Haba bteng na ki 18/1, ka Mizoram ka la shah pynhap wiket baroh ki nongtied na ka bynta ban kamai 90 bad ka la kiew khyndiat ha ki 33/10 na kaba long ha ka inning kaba nyngkong. Ka Meghalaya ka la lah ban kynjoh 230 run tang ha kawei ka inning.
Kumba 90 minit ka la donkam na ka bynta ka Meghalaya ba kan pynhap ïa ki khyndai wiket kiba dangsah khnang ba kan khur ïa ka jingjop bad ka la lah ban pynurlong lyngba ki nongkawang bol kiba kynsai kym u Abhishek Kumar, uba la khur 5 wiket (5/29) ha ka inning kaba nyngkong bad sa 6/4 ha ka inning kaba ar bad haba kheiñ lang u la khur haduh 11 wiket (11/33).
U Manish Sharma u la khur 3 wiket (3/24) ha kaba ula ïadon lang bad u Abhi-shek kum u nongtied uba kynsai ha ka jaka u PM Santhosh, uba la khlem ïoh ban ïalehkai kum u nong-tied bad kum u nongka-wang bol na ka daw ka jingmynsaw. Kiwei pat kiba la lah ban pynhap wiket ki long u Bipin Kumar Ray (1/9) bad u Agreas Cham-cham Sangma (1/11).
Ki nongtied ka Mizo-ram ki la shem jingeh ban ïalehkai bha ha kaba ki la shah pynhap wiket kloi kata haduh 6 wiket na ka bynta kamai 35 run. Ka jingshah pynkhyllem ki nongtied kiba kynsai ka Mizoram ka la pynlong ïa ka Meghalaya ban kynjoh sha ka thong jong ka jingjop.
Lyngba kane ka jingjop, ka Meghalaya ka lah ban ïakhun pyrshah ïa ka Nagaland lane ka Arunachal Pradesh ha ka final namar ka jingïakhun semi final jong kine ki kynhun kam pat poi sha kaba kut.
Kumba ka paw ka Meghalaya ka la lah ban pynliem ïa baroh ar kitei ki kynhun (Nagaland bad Arunachal Pradesh) ha ka jingïalehkai ’round robin stage’. Haba kheiñ lang ka Meghalaya ka la lah ban khur haduh hynriew tylli ki jingjop ha kane ka jingïakhun.
Ïa ka jingïakhun final yn pynlong ha ka 18 tarik mynta u bnai bad ïa ka jaka yn sa pynthikna hadien.
