Jerusalem, Rymphang:
Ka tnat shipai jong ka Israel ha ka Sngi Nyngkong ka la pyntip ba ka la ioh ban pyllait ia 2 ngut kiba shah rahbor baroh shi katta na ka kti jong ki lehnoh Hamas ha ka jingleit khynra bad jingleit hiar thma jongki shimiet- shimiet sha ka thaiñ Southern jong ka nongbah Gaza hapoh Rafah.
Haba iadei bad kane, la ong ba ka tnat shipai Israel ka la pyntip ba da ka jingiatrei lang jong ka tnat IDF (Military) bad ka ISA (Shin Bet Security Agency) bad kumjuh ruh ka tnat pulit jong ka Israel na Rafah, ki la ioh ban pyllait im noh ia 2 ngut kiba la shah rahbor ha ki lehnoh Hamas baroh shi katta bad kitei ki 2 ngut ki kynthup ia u Fernando Simon Marman (60 snem) bad u Louis Har uba la 70 snem ka rta bad la ong ba kine ki 2 ngut ki dei kiba la shah rahbor ha ki lehnoh Hamas naduh ka por ba sdang ka jingleit hiar thma jongki pyrshah ia ka Israel ha ka 7 tarik u Risaw jong u snem ba la lah.
La iathuh ba baroh 2 ngut kitei ki tymmen, ki don hapdeng ka met kaba koit- ba khiah bad ki shait- ki khlaiñ kumba ju long hi baroh shi katta.
Ha katei ka por jingleit hiar thma jong ki Hamas ha ka 7 tarik u Risaw, la ong ba ki lehnoh Hamas ki la rahbor ruh haduh palat 200 tam ki briew na Israel kynthup ia ki nong Israel bad kumjuh ruh ia kito kiba nabar ka Israel hynrei kiba shu leit shong shipor hapoh Israel namar ki kam- ki jam jongki.
Dei naduh katei ka por ruh ba ka Israel ka la khie bitar bad smai ban pynhiar kput ia ka kynhun lehnoh Hamas bad ka Israel ka la smai ruh ba kan pynduh jait syndon ia katei ka seng lehnoh ba shyrkhei jong ka Palestine khnang ba kan ym long shuh ka jingma ym tang ia ka Israel hynrei wat ia kiwei ruh ki ri ba marjan hadien- habud.
