Kohima, Rymphang:
Ka jingïatreilang jong ki shipai ka tnat Assam Rifles bad ki pulit jong ka Mizoram, ban ïakhun pyrshah ïa ki nongkhaïi drok ka la wanrah ïa ka jingjop ha kaba ki la ïoh ban kurup ïa u drok uba la kot sha ka T. 1.75 klur ha Champhai.
Ki jingleit khynra ba la pynlong, ki la ïarap ha ka ban ïohkem ïa ki shijur bad uwei pat u nongshong shnong jong ka Myanmar halor ka jingdonkti jong ki ban khaïi ïa ki jingdih pynbuaid, la ïathuh ka jingthoh ba la wan na ka tnat Assam Rifles.
Ha ka por ba ka la don ka jingleit khynra lang ha ka surok hajan lad Melbuk kaba don ha Champhai distrik, la ïoh ban kurup ïa 124 grams u Heroin uba la kot sha ka T. 86.8 lak ha kaba la aiti noh sha ki heh ba dei khmih. Ïa kine ki song jong u jingdih pynbuaid, la rah da u Kapneihchhawna (40) uba dei u nongshong shnong jong ka Sadaw kaba don ha Myanmar.
Ha kawei pat ka jingpyntreikam kaba la long ha New Hruikawn kaba don ha Zokhawthar kaba don ha ki bynta khappud jong ka Mizoram-Myanmar, uwei u briew lem bad ka kurim jong u, ki la shahkem ha kaba na ki la ïoh ban kurup ïa u drok ba 127 grams uba la kot sha ka T. 88.9 lak.
