Nongstoiñ, Rymphang 12
Ka jingmih shakhmat jong ki riew rangbah ban plie ïa ka shlem ai jinghikai ha kaba ïadei bad ka kam ïalehkai phutbol lehse kan sa long ka kabu ksiar ïa ki khynnah don sap bad kiba thrang kumno ban pyntbit ïalade ha ka kam ïalehkai phutbol.
Ka Bright Star Football Academy ka dei kawei na ki shlem ai jinghikai phutbol ïa kaba la plie paidbah hapoh ka sor Nongstoiñ ha ka sngi Saitjaiñ ha kaba u Bah Srally Rashir, Sordar ka shnong New Nongstoiñ u la long kum u kongsan ha ryngkat ka jingïasynranlang u Dr. Lum Mawsor, Vice President ka Meghalaya Football Association kum u symbud kongsan bad kiwei kiwei.
Ha katei ka sngi kum ka dak jong ka jingplie paidbah u kongsan u la ïoh ban khap ïa u ribbon bad u la ai ruh ka jingïaroh ïa u Bah Precioustone Ryntathiang, President katei ka shlem ai jinghikai kumjuh ruh ïa ka ïing jong u namar ka jinglong ba la kloi jong ka ïing ban wan seng ïa kum katei ka shlem kaba lah ban hikai ïa ki khynnah jong ka thaiñ ba kin kiew ha ka jingïalehkai phutbol kaba long kawei na ki jingkilan met ka ban pynlait ïa ki khun samla na ki jingmlien ba sniew.
Shuh shuh ha katei shlem ai jinghikai yn hikai da u Bah Abandonmame Lamin, AIFF Blue Cubs Leader AIFF D License Futsal 1 uba dei uwei na ki coach uba la pawbha ha ka jylla.
Katei ka shlem ka don ha ka kyntoit Nondeiñ jong ka shnong New Nongstoiñ. Ha katei kajuh ka jaka kaba don ka madan ai jinghikai la pynlong ïa katei ka jingïalang plie paidbah bad la pynïaid ïa ka jingïalang da u Bah Franky Hoojon kum u shongknor.
