Jammu, Rymphang:
Ki shipai ka tnat ïada ri ki la siat ïa ka Drone jong ki nong Pakistan hajan u Line of Control (LoC) ha Poonch distrik kaba don ha Jammu & Kashmir, la ïathuh ki heh pulit hynnin ka sngi.
Kane ka Drone kumba la khmih bniah, la ithuh ba ka la thmu ban leit phai sha ka liang jong ka Pakistan hadien ba ka la dep ban wan sha ki bynta jong kane ka ri ha ka miet jong ka sngi Saitjaiñ, la ïathuh shuh shuh ki pulit.
Ki la ong shuh shuh ba ka jingwan rung jong ki Drone jong ki nongshun ka la long ha ka thaiñ Nar Mankote jong ka Mendhar bad ki shipai kiba la pahara ha ki bynta jong u LoC ki la siat da kumba lai sien siat ban pynhap ïa kane ka Drone.
Kane ka Drone ka la leit phai biang sha ka liang jong ka Pakistan hadien ba ka la shah siat ha ki shipai, la ïathuh ki pulit, ha kaba ki la bynrap shuh shuh da kaba ong ba ka jingleit thwet bad ka jingjurip bniah ha katei ka thaiñ ka dang ïai bteng haduh mynta.
Ki pulit jong ka Jammu & Kashmir dang shen ki la pynbna ïa ka khusnam kaba T. 3 lak sha kino kino kiba pyntip halor ka jingdon jong ki Drone kiba her na ki bynta khappud bad kiba pynhap ïa ki jingdih pynbuaid, ki tiar siat ne pynbthei, ka ban ïarap ha ka ban ïoh kurup ïa ki.
