Shillong, Rymphang 12
Ka Shillong Lajong FC ka la mad ïa ka jingshah rem kaba saw ha ka lympung ïalehkai I-League, hynrei ka la khur ïa ka jingjop ha ka U-17 Youth League ba la pynïaid da ka All India Football Federation ha ka lah sngi U Blei.
Kane ka kynhun ïalehkai ka nongbah hapoh ka jingïalam u Bah Bobby L. Nongbet (coach), ka la shah rem ha ka Gokulam Kerala da 0-2 kol. Kane la wan lyngba u Sourav K (45+4) lem bad u rangïalehkai na Serbia u Matija Babovic (72).
Kane ka jingshah rem ka la pynlong ïa ka SLFC ban hiar sha ka kyrdan ba hynriew bad kamai 19 point na ki 13 sien ïakhun, katba ka Gokulam Kerala ka la jam sha ka kyrdan balai 23 point.
Haba phai sha ka jingïakhun jong ka U-17 Youth League (Group-C) kaba la long ha SSA Stadium Polo, ka Lajong ka la pynjem khnap ïa ka Harisinga Town Club da 6-1 kol.
Ha kane ka jingïakhun u Fabrizio Bakynsai Majaw u la ïoh ban pynkhih jar nyngkong na ka bynta ka Lajong ha ka minit kaba 7, hynrei tang hadien ar minit u Chandan Boro u la lah ban pynïakhaid kylla na ka bynta ka Harisinga.
Hadien katto katne por ka Lajong ka la ïai bteng ban ïakhun tyngeh bad hashwa ban kut ka jingïalehkai jong ka kylla step ba ka la ïoh ban thep biang ïa ka kol kaba ar lyngba u Yohaan Benjamin ha ka minit kab 43 na ka bynta ban tam da 2-1 kol.
Hadien ba la bteng biang ïa ka jingïakhun jong ka kylla miet ka Lajong ka la ïai bteng ha ka ban thep sa saw kol. Kane ka la wan lyngba u Banlamkupar Rynjah (83?), bud sa u Yohaan (85?), Banlamkupar again (88?) bad hashwa ban wai la thep da u Ricky Kharkongor (90’+4) na ka bynta ban khur syndon ïa ka jingjop.
Lah ban pynkynmaw ka Lajong ka la shah rem ha ka Harisinga ha ka wat kaba nyngkong kaba la long ha Kokrajhar ha ka 2 tarik mynta u bnai, hynrei ha kane ka jingïakhun ka Lajong kam shym la ailad ban shah rem biang.
Kumba ka long mynta ka Lajong ka la don ha ka kyrdan balai ha kaba ka dangsah sa shisien ïakhun. hadien ki hynñiew sien iakhun, ka Lajong ka la kamai 11 point ha kaba ka la ïaryngkat bad ka Aizawl FC kaba don ha ka kyrdan ba-ar, katba ka Football 4 Change Academy na Manipur ka la bat ïa ka kyrdan ba hakhlieh da kaba kamai 16 point. Ka NorthEast United ka la don ha ka kyrdan basaw bad 9 point, katba ka Harisinga ka la don ha ka kyrdan ba shatrai jong kane ka group da kaba kamai 3 point.
Ki jingïalehkai ba khatduh jong kane ka group kin long ha ka sngi Balang ha kaba ka Lajong kan ïakhun pyrshah ïa ka Aizawl ha SSA Stadium, katba ka NEUFC ïa ka F4CA ha Third Ground, Polo. Kine ki jingïalehkai kin long ha ka por 2 baje janmiet.
