New Delhi, Rymphang:
Ka Supreme Court ha ka jingai hukum jong ka hynnin ka sngi ka la nang pynjlan shuh shuh ha kaba ïadei bad ka jingai jamin ïa u Ashish Mishra, uba long u snar ba la shah kynnoh donkti ha ka jingjia jong ka jingïakynad kaba la jia ha Lakhimpur Kheri ha u snem 2021 ha kaba ki la don kumba 8 ngut ki briew, kynthup ïa saw ngut ki nongrep kiba la shah tylliat ha ki shaka kali, haduh ka tarik ban da don biang ka jingbishar bniah.
Ka kynhun nongbishar jong u Justice Surya Kant bad Justice K V Viswanathan ka la hukum ïa ka ïingbishar bahakhliehduh ba kan pynïoh biang ïa ka kaiphot na ka ïingbishar kaba la pynlong ïa ka jingtohkit bad ban buh sngi shwa ha kaba ïadei bad kane ka bynta. Ka mukotduma ka la long halor ka jingjia jong ka jingïakynad ha ka 3 tarik, Risaw, 2021 ha kaba ki la don kumba 8 ngut ki briew kynthup ïa saw ngut ki nongrep kiba la ïap ha Tikunia kaba don ha Lakhimpur Kheri distrik joing ka Uttar Pradesh.
Ka ïingbishar ka la khmih ïa ka jingkyrpad jamin ba la phah na ka bynta u Mishra da ka ïingbishar ba la bishar ïa u ha ka 25 tarik, Kyllalyngkot. U Mishra u la shah bthah ba um dei ban sah ha Uttar Pradesh ne ha Delhi ha kine ki por ba u shah pyllait jamin. Ka ïingbishar ka la pdiang ïa ka jingkyrpad bad mynjur ban pyllait jamin ïa u Mishra naba u ong ba ka kmie jong u ka la shah sumar ha Ram Manohar Lohia (RML) Hospital ha Delhi. Shuh shuh u la ong ba ka khun jong u ka la donkam ban phah sumar na ki jingshitom ki kjat.
Ka kynhun nongbishar ka la ai hukum ba la dei ban pyllait jamin ïa u Mishra, hynrei la ong ba um dei ban ïashim bynta ha kino kino ki prokram ha ki jaka paidbah ha Delhi ne ban ai jingkren sha ki nongthoh khubor ha kaba ïadei bad kane ka jingjia, naba u dang don hapdeng ka jingshah tohkit.
