Shillong, Rymphang 12
Ka ‘thei ïalehkai phutbol jong ka Jylla ka Bonifila Shullai ka la shah kynthup hapoh ka thup jong 30 ngut ki ‘thei ïalehkai Under-16 na ka bynta ban pynkhreh ïa ka lympung ïalehkai SAFF U-16 Women’s Championship ka ban long ha Lalitpur, Nepal naduh 1 tarik haduh 10 tarik u Lber mynta u snem.
Ïa kane la pynbna da u coach bathymmai u Biby Thomas Muttath ha ka Lah Sngi U Blei bad kane ka kynhun kan hap ban kilanmet ha Goa naduh ba la lah ban pyndep ïa ka jingjied ïa ‘thei ïalehkai kiba kynsai hashwa ba kan leit sha Nepal ha ka 27 tarik mynta u bnai.
Ha kine ki khyndiat snem ba la lah ka Bonifilia ka la pynïasoh sha ka kynhun ïalehkai U-15 jong ka Bengaluru FC.
Ha kane ka lympung ka ban long ha Nepal, ka India kan ïakhun pyrshah ïa ka Bhutan ha ka 1 tarik u Lber, kumjuh ïa ka Bangladesh ha ka 5 tarik bad ka Nepal ha ka 7 tarik. Ki ar tylli ki kynhun ki ban wan ha ki kyrdan ba hakhlieh kin ïoh rung sha ka final ka ban long ha ka 10 tarik. Ïa kine baroh ki jingïalehkai yn pynlong ha Chyasal Stadium kaba ha Lalitpur.
Ki kyrteng ki 30 ngut ki ‘thei ïalehkai ka ri India
Goalkeeper: Konjengbam Tamphasana Devi, Munni, Rubina, Surajmuni Kumari & Thameena Fatima.
Defender: Amrita Ghosh, Anjali Patel, Bonifila Shullai, Divya Linda, Elizabed Lakra, Gauri, Rupashree Munda, Sarangthem Alena Devi & Tia Zamora Fernandes.
Midfielder: Anita Dung-dung, Anushka Kumari, Anwita Raghuraman, H Yashica, Rheanna Liz Jacob, Ritu Badaik, Shveta Rani, Than-damoni Baskey & Tonambam Taniya Devi.
Forward: Anchal Singh, Gurleen Kaur, Gurnaz Kaur, Longajam Nira Chanu, Neha Saji, Pearl Fernandes & Sandhya.
Nalor u Biby Thomas, uba long u assistant coach ka kynhun ïalehkai ka ri kaba la khur ïa ka nam lahduh ha ka SAFF U-19 Championship ha Nepal ha u snem ba la lah, kiwei pat ki long ka Nivetha Ramadass kum ka assistant coach bad u Jasmeet Singh uba dei u goalkeeper coach.
