Washington, Rymphang:
Katkum ki khubor la iathuh ba uwei heh nongialam ka uba long ruh u Secretary jong ka tnat Iada ri ka US, u Lloyd Austin u la ioh kem pang kynsan bad la pynkit noh ia u ha ka janmiet Sngi U Blei sha jaka sumar namar ki jingshitom ba iadei bad ka pla umpynjhieh.
La ong ba ha katei ka miet, la pynthiah noh ia utei u briew hapoh ka jaka sumar Walter Reed National Military Medical Center na ka bynta ban ioh peit bniah bad ban sumar ia katei jingshitom kiba u don.
Katei ka jingpoi leit thiah hospital jong utei u nongialam ka long tang hadien katto katne taiew ba la paw pyrthei ba utei u heh um shym la shah ia ki jaka sumar kiba ju sumar ia u ba kin pyntip ne pynpaw pyrthei halor ki jingpang jingshitom jong u namar u iohi ruh ba u President ka US, u Joe Biden u dang bunkam ban pynleit jingmut haba iadei bad ka thma khamtam ia ka jinglong-jingma ha Middle East bad kumjuh ruh ha Ukraine.
La ong ba u Austin ha u Nohprah jong u snem ba la dep, u la ioh ban jah khlem da pyntip ne pynpaw pyrthei ban phah sumar ia katei ka jingpang bampong kaba u don bad kumjuh ruh u la leh ha une u Kyllalyngkot ba la lah hadien ba u la kynduh jingeh na kitei ki jingshitom kiba pynthud ia ka met jong u.
Hynrei ha kane ka sien, la pyntip paidbah noh tang hadien 2 kynta ba la pynkit ia u sha katei ka jaka sumar ha ka por shiteng sngi jong ka Sngi U Blei bad ka Deputy Secretary jong ka tnat iada ka Kathleen Hicks ka la kloi ban shimti noh ia ki kam ki jam ha ka jaka jong u Austin tang mar ia ioh jingtip halor katei ka khubor ka jingioh kem pang jong utei u nongialam ha katei ka sngi.
Kat ia mynta ym pat ioh jingtip ba haduh katno sngi ne ia ka por ba utei u nongialam un don hapoh katei ka jaka sumar.
