Srinagar, Rymphang:
Ka sorkar kmie ha ka taïew ba la lah ka la dep ban pynbna ba ki la don kumba 73 ngut ki lehnoh, 30 ngut ki shipai ïada ri bad 14 ngut ki riew paidbah kiba la shah pynïap ha Jammu & Kashmir ha u snem 2023, katba 46 tylli ki kam pyntriem jong ki lehnoh kiba la jia bad 48 tylli ki jingïasiat ba markylliang hapdeng ki lehnoh bad ki shipai ïada ri kiba la jia ha u snem ba la lah.
Ha ka jingai jubab ba la buh ha Rajya Sabha, u Myntri khynnah jong ka tnat ki kam pohïing u Nityanad Rai u la ong ba ka sorkar kam shym la lah ban leh ei ei ha kaba ïadei bad ka jingdon jong ki kam pyntriem jong ki lehnoh ne ban ïakhun pyrshah ïa ki bad kam lah ban ai ki lad jingïada bad buh jingshngaiñ ha Jammu & Kashmir.
U la ong ruh ba kam shym la don kano kano ka jingjia ha kaba ïadei bad ki kam pyntriem jong ki lehnoh ha Ladakh naduh u snem 2019 haduh 2023.
Ha ka jingai ïa ka jingbatai kaba bniah, u Myntri u la ong ba ki la don kumba 153 tylli ki kam pyntriem jong ki lehnoh kiba la jia ha u snem 2019, 126 tylli ha u snem 2020, 129 tylli ha u snem 2021 bad 251 tylli ha u snem 2022.
U la ong ba ki la don kumba 102 tylli ki jingïasiat ba markylliang kiba la jia ha ka jingleit thwet lehnoh kiba la jia ha u snem 2019, 118 tylli ha u snem 2020, 100 tylli ha u snem 2021, bad 117 tylli ha u snem 2022, katba ki la don kumba 44 ngut ki riewpaidbah kiba la ïap ha ki ka por ba jia ki kam pyntriem jong ki lehnoh bad ha ka por ba don ki jingïasiat ba markylliang hapdeng ki lehnoh bad ki shipai ha u snem 2019, 38 ngut ha u snem 2020, 41 ngut ha u snem 2021 bad 31 ngut ha u snem 2022.
