Lucknow, Rymphang:
U heh nongïalam jong ka seng Congress u Rahul Gandhi u la rai ban pynlyngkot noh ïa ka por ban pynlong ïa ka Bharat Jodo Nyay Yatra ha Uttar Pradesh namar ka jingdon jong ka Board Examinations na ka bynta ka klas 10 bad 12 ha katei jylla, la ong ki dkhot jong ka seng hynnin ka sngi.
“Shi bynta ban ai ïa ka nuksa kaba bha ban don ka jingsngew ne ban pyrkhat halor kane, u Rahul Gandhi u la buh hakhmat eh ïa ka rai ha kaba ïadei bad ka bha ka miat jong ki riewpaidbah. Namar ba u la tip ba ka la don ka Board Examinations ha ka jylla ka ban sdang naduh ka 22 tarik, Rymphang, ïa ka Bharat Jodo Nyay Yatra yn sa buh ha Uttar Pradesh naduh ka 16 tarik, Rymphang haduh ka 21 tarik, Rymphang,” la ong u nongaiktien jong ka seng Congress u Anshu Awasthi ha ka jingthoh kaba u la phah.
Ïa ka Yatra hashwa la buh ba kan kut ha Uttar Pradesh haduh ka 26 tarik, Rymphang.
“Hashwa kane, u Rahul Gandhi u la pyndam noh ïa ki jingïalang paidbah ha Bengal namar ka jingsngewkhia na ka bynta ki briew ha ka por ba don ka COVID-19,” la ong u nongaiktien.
Ha kaba ïadei bad ka jingdon jong ka Bharat Jodo Nyay Yatra ha Uttar Pradesh, u Awasthi u la ong ba kan sa rung hapoh ka jylla lyngba na Varanasi ha ka 16 tarik, Rymphang, bad hadien kane kan sa poi ha Amethi ha ka 19 tarik, Rymphang lyngba na Bhadohi, Prayagraj bad Pratapgarh.
Ha ka 19 tarik, Rymphang, u Gandhi un sa ai jingkren ha ka jingïalang paidbah ha Gauriganj kaba don ha Amethi Lok Sabha konstitwensi bad nangne ka Yatra kan sa poi ha Rae Bareli ha ka sngi kaba bud bad kan sa ïaid shakhmat na ka bynta ka Lucknow bad ki nongïashim bynta ha ki jingïaid paidbah, kynthup u Gandhi kin sa sahmiet ha katei ka jaka, u la ong.
U nongaiktien u la ong ba ka Yatra kan sa poi ha Unnao na Lucknow ha ka 21 tarik, Rymphang. Kan sa rung ha Kanpur lyngba na Unnao bad Shuklaganj.
Kumjuh kan sa poi ha Jhansi lyngba ka Kanpur bad Hamirpur, ha kaba hadien kane kan sa rung ha Madhya Pradesh ha kajuh ka sngi.
