New Delhi, Rymphang:
Ki la don 7 ngut ki shipai duriaw ba la shongthait kiba la shah set patok ha Qatar, ki la shah pynphai biang sha India hynnin ka sngi, ha kaba kim shym tip ne bna ei ei halor ka jingshah pyllait jong ki, la ïathuh ka tyllong khubor.
Kine ki shipai kiba pawkhmat, ki la shah bthah ha ki Jailor ha ka miet jong ka sngi U Blei ba ki la dei ban song lut ïa ki tiar pyndonkam jong ki bad ban ap haduh ka por 9 baje mynstep kaba long ka por jong ki ha katei ka sngi.
Kine ki la shah ïalam sha Embassy bad khlem da pynslem kumta hi ki la shah ïalam sha ka jaka sangeh liengsuiñ, la ïathuh ka tyllong khubor.
Kine ki la shong da ka liengsuiñ IndiGo kaba la hiar ryngkew ha Delhi ha ka por 2 baje mynstep.
Kine ki 7 ngut ki shipai ki dei napdeng ki 8 ngut ki nong India kiba la shah rai ba kin shah pynïap ha ki kti jong ka aiñ ha ka ïingbishar ha Qatar ha u Risaw, halor ka jingshah kynnoh ba ki la long ki nongsyntiat.
Ïa ka rai pynshitom la pynkylla noh ha u Nohprah hadien ka jingïakren jong ki bor sorkar bad ki bor ba dei khmih jong ka India.
Sa uwei pat u shipai um pat wanphai ryngkat bad kine ki 7 ngut naba ym pat lah ban pyndep ïa ki jingdonkam ha ki kot ki sla ba la dei ban treikam ha kaba une shen un sa ïoh ban wanphai kumjuh.
Ki shipai kiba la ïoh ban wanphai mynta sha ka ri, ki kynthup ïa u Captain Navtej Singh Gill, u Captain Saurabh Vasisht, Commander Purnendu Tiwari , Captain Birendra Kumar Verma, Commander Sugunakar Pakala, Commander Sanjeev Gupta, Commander Amit Nagpal bad Sailor Ragesh, kine baroh ki shipai ki dei kiba la shongthait na ka kam shipai.
Kine ki phra ngut ki shipai ba la shongthait ki la shahkem ha Qatar ha u snem 2022 bad ki la shah set patok naduh utei u snem.
Haba la ïoh ïa ki kaiphot ba ki la shahkem halor ka jingshah kynnoh ba ki la long ki nongsyntiat, ym na ka liang ka New Delhi ne Doha ki ban lah ban pynshisha halor ka jingshah kynnoh kaba long pyrshah ïa ki.
Hashwa ba kin shahkem, kine ki shipai ki la trei ha kawei ka kompeni ki riewshimet, ka Dahra Global, bad ki la don bynta ban ai jinghikai pyntbit ïa ki shipai duriaw ka Qatar.
Ka jingthoh kaba la wan na ka External Affairs Ministry ka la pyntip halor ka jingshah pyllait jong ki bad ong ba ki nong India ki la pdiang burom ïa kine ki shipai ba la shong thait kiba la trei ha ka kompeni Dahra Global ha kaba ki la shahkem ha Qatar.
