Ka jingjia kaba pynbitar pyrshah ïa uwei u doktor ka tnat Veterinary ha Muktapur, West Jaiñtia Hills, ha kaba arngut ki Border Security Force (BSF) kiba dei ban ïada ïa u pud u sam hapdeng ka India-Bangladesh ki la leh tohmet ïa u haduh ban da byrngem ruh ban siat ha u Zero Point ka long ka bym lah satia ban pdiang. Na ka por sha ka por, ki BSF ki ju mih khubor ym tang ba ki ïoh kurup ïa ki mar be-aiñ ne ba kem ïa ki nong India ne Bangladesh kiba thmu ban rung ne kam sha shiliang u pud u sam, hynrei wat ka jingleh tohmet ïa ki para nongshong shnong ki bym don jingtip eiei. Ka jingsaphriang jong ka dur khih ha kaba u doktor u la batai shai ïa kaei kaba la jia kan nang pynïajngai ïa ka jingïadei hapdeng ki ‘riew paidbah kiba sah ha khappud bad ki BSF. Ngi sngewthuh na ka jingbatai jong u doktor ba u khlem pynkheiñ ïa kino-kino ki aiñ bad u dei ruh u rangbah uba ju ïatreilang bad ki BSF ha man la ki khep kiba donkam. Namarkata, lada kat ïa u doktor uba dei ruh u trai shnong u la shah leh kumto, sa ma ngi ki ‘riew paidbah lei katno tam?
Ka jingshah siat ïap jong u Bah Roning Nongkynrih uba na Jalynteng, Raid Nongkynrih, uba dei u nongñiah trok kit masi ha ka miet jong ka 5 tarik Jymmang, 2023 ha ki BSF ha kawei ka jaka hapdeng ka shnong Pomshutia bad Mawshun ka dang don ha ka jingmut jingpyrkhat ka jong ngi. U Bah Roning bad ka ïing ka sem jong u, ki khlem pat ïoh satia ïa ka jingbishar kaba hok halor kane ka jingjia kaba la wan lap. Ngim tip kan shimpor sa katno bnai ne snem tad haduh ba u Bah Roning bad ki bahaïing hasem kin ïoh ïa ka hok ka jong ki. Ym tang katta. Ka jingshah pynïap jong kawei ka longkmie kaba na East Jaiñtia Hills ha ki suba nong Bangladesh ha u snem ba la lah bad sa uwei pat u rangbah na East Jaiñtia Hills ha u bnai ba la lah, ki dei ki jingjia kiba pyni ïa ka jingpulom jong ki BSF ban teh lakam ïa ka rung ka mih jong ki briew kiba na sha shiliang khappud bad kiba ïoh ban wan leh ïa ki kam pyntriem shapoh u pud u sam jong ka India. Hooid, kam dei kaba suk ban pahara ha man la ki kyndong kynshrot jong u pud u sam, hynrei ngi don ka jingkyrmen pat ha ki BSF namar dei ma ki kiba hap ban kitkhlieh.
Kiba kum kine ki jingjia ki wanrah ïa ka jingbym sngewtynnad hapdeng ki nongshong shnong bad ki BSF. Hooid, ym baroh ki BSF ki long kumtei. Ki don kiba pyndep la ka jong ka kamram khlem da pyndik ïa ki trai shnong. Hynrei ki don pat kiba kwah pyni bor khlem daw haduh ba kim ithuh shuh uno u trai shnong bad uno u bar ri. Ka kamram jong ki BSF kam dei ban pyndik ïa ki trai shnong, hynrei ban khanglad ïa ki kam runar, kam be-aiñ bad ka jingïarung ïa mih khlem kyndon ha khappud. Lada ki paidbah trai shnong trai muluk ki donkam ban leit shajan u mawpud, ki BSF kim dei ban khanglad khlem daw lait noh sa tang lada don ki jingjia kiba ktah ïa ka shongsuk shongsaiñ bad kaba buh ïa ka jingim briew hapdeng ka jingma.
Ka lynti ban wanrah biang ïa ka jingshaniah ha ki BSF ka long ba lada ki heh jong kane ka tnat ïada khappud ka leh eiei ïa kito kiba donkti ban pynsyier ïa ki nongshong shnong. Haduh mynta, ngim tip kaei kaba la jia ïa kito ki BSF kiba la siat ïap ïa u Bah Roning. Ngim tip la kin sa shah pynshitom ne em ha ka rukom kaba dei khnang ba kan long kum ka nuksa ïa kiwei pat kiba kwah ban pyni bor ïa ki briew ki bym don bor. Kane ka jingslem ban pyni paidbah ba ki BSF ki la pynshitom ïa kito kiba donkti ym tang ba ka pynthud ïa ka jingïadei hapdeng ki nongshong shnong bad kane ka tnat, hynrei ka pyni ruh ba lehse wat lada siat ïap ïa la u jong u nongshong shnong, ka aiñ kam lah ban leh eiei. Lada ka long ha kata ka dur, kan ai mynsiem pynban ïa kito ki BSF kiba don ïa ki jingthmu basniew pyrshah ïa ki para nongshong shnong. Ha kajuh ka rukom, lada ym pynshitom ïa ki arngut ki BSF kiba la leh tohmet ïa utei u doktor ha Muktapur, kan long kum ka jingai mynsiem ïa kiwei ba kin leh kumjuh ne kham palat.
Ki BSF ki dei ban sngewthuh ba lada ki kwah ban teh lakam ïa ki kam be-aiñ ha khappud, ki donkam ïa ka jingïatreilang jong ki nongshong shnong khamtam kiba shong ba sah ha ki shnong ki thaw hajan jong u pud u sam. Kin ym lah ban leh eiei lada ki trai shnong kim treh ban ai ïa ka jingïatreilang ka jong ki. Kan shu long lehnohei ka jingpynlut por ban ïada ïa ki kam sniew. Ka dei ban don ka jingïasngewthuh jingmut bad ka jingïatreilang khnang ba ki jingthmu kiba bha kin long kiba jop. Ki heh jong ki BSF ki dei ban shimkhia halor kitei ki jingjia ba la kdew haneng. Kim dei ban shu shong kli kti bad sngap man-man namar kan ym wanrah ïa ka jingbha. Ngi kyrmen ba baroh kito ki BSF kiba la donkti ban lehbeiñ ïa ki nongshong shnong kin sa ngat ha ka jingshah pynsaja kaba tyngeh khnang ba kan long kum ka jingsneng ïa kiwei.
