Ranchi, Rymphang:
Ka Jharkhand High Court hynnin ka sngi ka la pynsangeh shwa ïa ka jingbishar bniah ha kaba ïadei bad ka jingmudui ba la phah da u Myntri Rangbah barim uba la shahkem u Hemant Soren pyrshah ïa ka kynhun Enforcement Directorate (ED) haduh ka 27 tarik, Rymphang.
Ka ïingbishar ka la pdiang ïa ka jingmudui ba la phah da u Soren katba na ka liang ka kynhun ED ka la pan por shuh shuh na ka bynta ban ai jubab ha kaba ïadei bad kane.
U Soren u la mudui da ka Criminal Writ and Interlocutory Application ha Jharkhand High Court.
Kum u nongmihkhmat na ka liang jong u Hemant Soren, u heh nongïasaid aiñ jong ka Supreme Court u Kapil Sibal u la ong ba ka mat ba ïadei bad ka jinglaitluid ka la shah ktah jur bad ka kynhun ED ka la pynlong ïa ka jingtohkit shabar jong ka aiñ.
Katkum ka jingmudui jong u Soren, la ong ba ka jingshahkem jong u ka la long ka jingïasuhbuit kaba la long pyrshah ïa u Myntri Rangbah ba mynta.
Hashwa kane, kata ha ka 5 tarik, Kyllalyngkot, ka HC ka la hukum ïa ka kynhun ED ba kan phah ïa ka jubab ha kaba ïadei bad ka jingmudui jong u Myntri Rangbah barim u Hemant Soren ban pyrshah jur halor ka jingshahkem jong u ha ka 9 tarik, Rymphang.
Ha kaba ïadei bad kane, u Myntri Rangbah barim u la hap ban leit mih sha Supreme Court ban pynibor pyrshah halor ka jingshahkem jong u, hynrei ka ïingbishar ka la kyntait ban khmih bniah halor ka jingmudui jong u bad ong ïa u ba u la dei ban leit mih ha ka ïing bishar kaba dei ban khmih halor ka jingmudui jong u kata sha High Court.
Ka kynhun ED, hadien ba ka la shah kylli jingkylli da palat 7 kynta ha ka 31 tarik, Kyllalyngkot, ka la kem noh ïa u Hemant Soren na ka jaka sah jong u kaba don ha Ranchi.
U Soren mynta u dang shah set bad don ha ki kti jong ka kynhun ED na ka bynta ka jingshah tohkit kaba la kut hynnin ka sngi bad un sa shah ïalam hakhmat ka ïingbishar bakyrpang jong ka PMLA ha Ranchi.
U nongïalam jong ka seng JMM ha ka 2 tarik, Rymphang u la shah tohkit ha ka kynhun ED bad shah set na ka bynta ban tohkit ha ka ïingbishar PMLA (the Prevention of Money Laundering Act) ha Ranchi na ka bynta san sngi. Ka ïingbishar ha ka 7 tarik, ka la nang pynjlan sngi shuh shuh ba un shah set ha ka kynhun ED sa san sngi.
