Shillong, Rymphang 13
Ka Jylla kan pynlong ïa ka jingïalehkai siatkhnam na ka bynta ka Khelo India University Games 2024 ka ban long ha kane ka nongbah naduh 20 haduh 24 tarik mynta u bnai ha SAI Training Centre.
Shi bynta ban pynbna paidbah shaphang kane ka lympung ïalehkai, ka tnat ïalehkai jong ka Sorkar Jylla ha ryngkat ka North Eastern Hill University, Shillong bad ka Sports Authority of India, Shillong kin pynlong da ka jingïakop mareh ba la tip kum ka ‘6.5K Run’ lem bad kiwei ki jingïalehkai ha ka 15 tarik mynta u bnai.
Kane ka jingïakop mareh kan sdang ha ka por 9 baje mynstep na parking lot jong ka N.E.H.U Administrative Block, Shillong ha kaba yn ïaid lyngba ka Gate No 3 – Mawkynroh Junction – Mawroh Road – Umshing Umjapung – Sanker Junction – Mawlai Mawroh Community Hall – Mawroh Main Junction – Stephan Memorial School, Mawroh – Umsohkhlur, Mawroh – Mawlai Kynton Massar Junction – N.E.H.U, Shillong Gate No 2 – Finishing Point bad ban pynkut pat ha N.E.H.U, Shillong Administrative Building Parking Lot.
Kane ka jingïakop kan long na ka bynta ki khynnah shyrnang bad kynthei ha kaba la pynkhreh ïa ki khusnam na ka bynta ki nongjop ha kaba kin ïoh T.5,000/-, T.3,000/- bad T. 2000/- ïa kiba wan ha ka kyrdan ba nyngkong, ba-ar bad balai. Ki nongmareh kiba 50 snem shaneng ki ban wan hapoh ka thhup kaba san kin ïoh ïa ka khusnam pisa kaba T. 1000.
Te kumta ki nongïashim bynta ki lah ban pynrung kyrteng ïalade lyngba ka online ha ka bit.ly/4bCBgqw bad ruh ha ka offline ha ka shlem treikam u District Sports Officer ka East Khasi Hills District, Shillong kaba don ha J.N Sports Complex Polo, Shillong ha ka por longtrei.
La pynkhreh ruh ïa ki T-Shirt bad ki Chest number na ka bynta ki nongïashim bynta ha kaba yn sam ha ka step jong ka 15 tarik naduh ka por 7:30 mynstep.
