Shillong, Rymphang 13
Ka ilekshon na ka bynta ban pynthymmai ïa ki nongkitkam jong ka All India Chess Federation (AICF) kan long ha ka 10 tarik u Lber ha ka nongbah Delhi, la pynbna ki Returning Officer.
Kane ka jingpynbna ka la long kaba kham slem na kaba ju long borabor namar ïa kane ka ilekshon la pynbna kham ha shwa ban pynlong shwa ka 3 tarik u Kyllalyngkot mynta u snem.
Na ka liang ki Returning Officer na ka bynta ka ilekshon jong ka AICF kiba kynthup ïa u Justice G.S.Sistani (Retired), u nongbishar barim ka Delhi High Court, u Justice Rang Nath Pandey (Retired), uba long u nongbishar barim ka High Court jong ka Allahabad, ki la pynbna ïa ka tarik na ka bynta katei ka ilekshon.
“La pyntip sha baroh ki dkhot ba ka ilekshon jong ka All India Chess Federation na ka bynta u snem 2024-2027 yn pynlong ha nongbah Delhi ha ka 10 tarik u Lber ha kaba ïa ka jaka yn sa pyntip ryngkat ki kyndon,” la pynbna ki ar ngut ki Returning Officer ha ka 10 tarik mynta u bnai.
“Ki Returning Officer kin hap ban rai nyngkong halor ka jingjied ïa ki dkhot. Katto katne ki synjuk ïalehkai Chess ki la shah sospon bad la thung da ki ‘ad hoc body’ ki ban pynïaid ïa ki kam ki jam na ka bynta kito ki jylla. Te kumta mano ban ïoh thep vote bad mano ki ban duh bad kane kan shong ha ka rai jong ki Returning Officer. Te kumta yn sa pynrung ïa ki nongthep kyrteng,” la pynpaw ki dkhot jong ka synjuk ïalehkai chess.
