Shillong, Rymphang 13
Hadien san snem ba kam shym la ïashim bynta ha kino kino ki lympung ïalehkai, ka khlur ïalehkai gymnastic ka Dipa Karmakar sa shisien pat kan mihkhmat biang ïa ka ri India ha ka World Gymnastics Championships ka ban long ha Cairo, Egypt naduh 15 haduh 18 tarik mynta u bnai.
Ka Dipa kaba la lah ban pynpaw ïa ka jingtbit ha ka Rio Olympics, ka la don ha nongbah Delhi ha ka taiew ba la dep hashwa ba kan mih ban leit ïashim bynta ha katei ka jingïakop.
Watla ka la don hapdeng ka jingmynsaw ha ka kjat kamon, ka Dipa kaba la ïohpdiang ïa ka khusnam Padma Shri ka la khmih lynti ban pynpaw pyrthei biang ïalade, la pynpaw u kpa jong ka, u Dulal Karmakar.
Na ka liang u coach jong ka, u Vishveshwar Nandi uba la ïohpdiang ïa ka khusnam Dronacharya, u la pynpaw ka jingkyrmen skhem ba kan lah ban ïalehkai ïa ka jingtbit wat hapdeng katei ka jingmynsaw.
“Kam pat shymn la koit pura na ka jingmynsaw ka kjat, hynrei nga shaniah skhem ha ka ba kan lah ban wanrah burom ïa ka ri lyngba ka jingïalehkai bha ka jong ka.”
Kane ka khlur ïalehkai ka la duh ïalehkai haduh lai snem kynthih hadien ba la lap ba ka pyndonkam ïa ki jingdih kiba long pyrshah, hynrei kam shym la kynran dien na ka bynta ban ïai pynkhreh ïalade khnang ba kan pynpaw ia ka jingtbit ha katei ka lympung ïalehkai ka pyrthei.
Na ka liang ka synjuk ïalehkai jong ka Tripura Gymnastics Association ka la ai khublei kitbok ïa katei ka khlur ïalehkai gymnastic ba kan lah ban pynpaw ïa ka jingtbit khnang ba ka lah ban wanrah burom ïa ka ri hi baroh kawei.
